ەكى كۇن قاتارىنان تاڭەرتەڭنەن كەشكە دەيىن ۇيىمداستىرىلعان ءىس-شارا ەلوردالىق بالالار مەن ولاردىڭ اتا-انالارىنا ەرەكشە مەرەكەلىك كوڭىل-كۇي سىيلادى. «جەتىسۋ» ساياباعى اكىمشىلىگىنىڭ ۇيىمداستىرۋىمەن 1 ماۋسىم حالىقارالىق بالالاردى قورعاۋ كۇنىندە وتەتىن فەستيۆال ەكى كۇندە دە تاڭعى يوگامەن باستالدى. بي ءانسامبلىنىڭ ونەرىمەن اشىلعان ءىس-شارا ودان ءارى ۇلتتىق كيىمدەردىڭ ءسان ۇلگىسىن كورسەتۋمەن جالعاستى. سونىمەن قاتار باعدارلاماعا سايكەس «جورگەكتەگى بالالار جارىسى»، «بالالار ارباسىمەن جارىس» بايقاۋلارى، كيدبۋرگ، بي كەشى ءوتتى. ەكىنشى كۇنىندە «ارت-جۇكتى ايەلدەر»، «Mrs.Bope Fair 2025» بايقاۋلارى، «حازار» لەزگينكا بي مەكتەبىنىڭ ونەرى، گاككۋ، «التىن ۇرپاق» كورسەتىلىمى ۇيىمداستىرىلدى.
«ءبىزدىڭ ساياباق «بوپەFair» وتباسىلىق فەستيۆالىن وتكىزۋدى 2017 جىلى باستاعان. يميدجدىك جوبامىزدىڭ بۇل ەكىنشى رەت ءوتۋى. بارلىق ءىس-شارا تەگىن، تاڭەرتەڭنەن ساعات 12.00-گە دەيىن بۇكىل اتتراكتسيوندار دا 14 جاسقا دەيىنگى بالالارعا اقىسىز بولادى. بۇدان باسقا دا فەستيۆالدەر ساياباقتا ءجيى وتكىزىلەدى. باستى ماقسات – مۇندا كەلگەن حالىقتىڭ بالالارىن تەك اتتراكتسيوندارعا مىنگىزىپ قانا قايتپاي، ۇلكەنگە دە، كىشىگە دە ۋاقىتىن قىزىقتى وتكىزۋىنە جاعداي جاساۋ. سول ءۇشىن ءتۇرلى كونتسەرتتىك باعدارلامالار، ويىندار ۇيىمداستىرىلىپ وتىرادى. جالپى ساياباقتىڭ اۋماعى – 14 گا. 2018 جىلى ساياباق قايتا قۇرىلىپ، ونىڭ جوندەلىپ، قازىرگىدەي بەزەندىرىلگەن جاڭا كەيپىن قالا كۇنىنە الماتى وبلىسى سىيعا تارتتى»، – دەيدى ساياباقتىڭ باسقارۋشىسى نۇريا سادۋاقاسوۆا.
ساياباققا مەرەكە كۇنى كەلگەن حالىقتىڭ قاراسى قالىڭ. بالالارىن ەرتكەن ەلوردالىقتار مەن قالا قوناقتارى ءار ءتۇرلى ءىس-شارالارعا قاتىسىپ، ءماز-مەيرام بولدى.
ەلوردا اكىمدىگىنىڭ رەسمي سايتى