مەملەكەتتىك تاپسىرىستىڭ 70%-ى تەحنيكالىق ماماندىقتارعا، ونىڭ ىشىندە ماشينا جاساۋ، كولىك، ەنەرگەتيكا، IT, قۇرىلىس جانە باسقا دا سالالارعا باعىتتالاتىن بولادى.
«نەگىزگى باسىمدىق – باسەكەگە قابىلەتتى ماماندار دايارلاۋ، ءبىلىم بەرۋ مەكەمەلەرىن زاماناۋي ماتەريالدىق-تەحنيكالىق بازامەن تولىق قامتاماسىز ەتۋ، پەداگوگتەردىڭ بىلىكتىلىگىن ارتتىرۋ. قازىرگى تاڭدا كاسىپتىك-تەحنيكالىق ءبىلىم بەرۋ جۇيەسىن ترانسفورماتسيالاۋ بويىنشا كەشەندى جۇمىس جۇرگىزىلۋدە، بۇل مەملەكەتتىك تاپسىرىستىڭ كولەمىن ۇلعايتۋدى، ءبىلىم بەرۋ باعدارلامالارىنا ۇزدىك حالىقارالىق تاجىريبەلەردى ەنگىزۋدى، كاسىبي شەبەرلىك چەمپيوناتتارىن وتكىزۋدى قامتيدى. سونداي-اق، كاسىپورىندار ءۇشىن ءدۋالدى وقىتۋ جۇيەسىن دامىتۋ جانە مامانداردى دايارلاۋ ماقساتىندا بيزنەس قۇرىلىمدارى مەن ينۆەستورلاردى تارتۋ جوسپارلانۋدا»، – دەپ اتاپ ءوتتى تەحنيكالىق جانە كاسىپتىك ءبىلىم دەپارتامەنتىنىڭ ديرەكتورى اسەت مۇحانبەتوۆ. قازىرگى ۋاقىتتا كوللەدجدەرگە 518 كاسىپورىن شەفتىك قامقورلىق كورسەتەدى، ولاردىڭ سانىن 4 مىڭعا جەتكىزۋ جوسپارلانۋدا. سونىمەن قاتار جۇمىس بەرۋشىلەرمەن بىرلەسىپ، كاسىپتىك ستاندارتتار مەن مەملەكەتتىك جالپىعا مىندەتتى ءبىلىم بەرۋ ستاندارتتارى جانە WorldSkills ستاندارتتارىنىڭ تالاپتارىن ەسكەرە وتىرىپ، 8 مىڭعا جۋىق ءبىلىم بەرۋ باعدارلاماسى ازىرلەندى. بيىل كوللەدجدەر مەن جۇمىس بەرۋشىلەر 2 مىڭنان استام ءبىلىم بەرۋ باعدارلاماسىن ازىرلەيدى جانە وندىرىستىك بازادا 2 مىڭ پەداگوگ تاعىلىمدامادان وتەدى.
اشىق دەرەككوزدەردەن