وقۋ-اعارتۋ ءمينيسترى عاني بەيسەمباەۆ پەن حالىقارالىق ساراپتاما جانە سەرتيفيكاتتاۋ عىلىمي-زەرتتەۋ ورتالىعىنىڭ (RCEC) ديرەكتورى ارنولد براۋەردىڭ كەزدەسۋى ءوتتى.
ببجم - وقۋشىلاردىڭ ءبىلىم ساپاسىن، مەملەكەتتىك جالپىعا مىندەتتى ءبىلىم بەرۋ ستاندارتتارىن (مجمبس) مەڭگەرۋ دەڭگەيىن ايقىندايتىن ۇلتتىق قۇرال بولىپ تابىلادى. 2023-2024 جىلدار ارالىعىندا قازاقستان رەسپۋبليكاسىنىڭ وقۋ-اعارتۋ مينيسترلىگى ببجم حالىقارالىق اككرەديتتەۋ پروتسەسىنە باستاماشىلىق ەتتى.
عاني بەيسەمباەۆتىڭ ايتۋىنشا، ببجم ۇلتتىق قۇرالىنىڭ حالىقارالىق اككرەديتاتسيادان ءوتۋى ونىڭ سەنىمدىلىگىن، شىنايىلىعىن جانە حالىقارالىق ساپا ستاندارتتارىنا سايكەستىگىن راستايدى. ببجم-ءنىڭ بارلىق كەزەڭدەرى مەن پروتسەدۋرالارى PISA, TIMSS جانە PIRLS سياقتى بەلگىلى زەرتتەۋلەردە قولدانىلاتىن عىلىمي تاسىلدەرگە نەگىزدەلگەن.
«قازاقستان ءبىلىم ساپاسىن ارتتىرۋ جولىندا سەنىمدى قادامدار جاساۋدا. ببجم-ءنىڭ حالىقارالىق تانىلۋى – وزىق تاسىلدەر مەن ستاندارتتاردى ەنگىزۋگە باعىتتالعان باعدارىمىزدىڭ دۇرىستىعىن دالەلدەيدى. ءبىز ۋاقىتتىڭ سىن-قاتەرلەرىنە توتەپ بەرە الاتىن جانە جاھاندىق ءبىلىم بەرۋ قاۋىمداستىعىنا ءساتتى ينتەگراتسيالانۋعا قابىلەتتى جۇيە قۇرۋدامىز. بۇل جەتىستىك ءبىلىم ساپاسىن ودان ءارى ارتتىرۋدا ماڭىزدى كەزەڭ بولاتىنىنا سەنىمدىمىز»، – دەدى مينيستر.
حالىقارالىق ساراپتاما جانە سەرتيفيكاتتاۋ عىلىمي-زەرتتەۋ ورتالىعىنىڭ (RCEC) ديرەكتورى ارنولد براۋەر اتاپ وتكەندەي، قازاقستاننىڭ ۇلتتىق باعالاۋ جۇيەسى ورتالىق ازيا ايماعىنداعى بىرلەسكەن باعالاۋ جوبالارىنىڭ نەگىزى نەمەسە ءبىر بولىگى بولا الادى.
«قازاقستاندىق ءبىلىم بەرۋ جۇيەسى قازىردىڭ وزىندە جاقسى ناتيجە كورسەتۋدە. ىنتىماقتاستىقتىڭ ەكى جىلىندا ببجم اككرەديتاتسياسىنىڭ 7 كەزەڭى جۇزەگە اسىرىلدى، ولار باعالاۋ جۇيەسىن ازىرلەۋدى، تەست سۇراقتارىنىڭ بازاسىن قۇرۋدى، بارلىق قاتىسۋشىلار ءۇشىن نۇسقاۋلىق ازىرلەۋدى، تسيفرلىق پلاتفورمادا تەستىلەۋدى اكىمشىلەندىرۋدى، حالىقارالىق ستاندارتتارعا سايكەس ناتيجەلەردى تالداۋدى قامتيدى. بۇل ءبىلىمدى باعالاۋ جۇيەسىن دامىتۋداعى ماڭىزدى قادام»، – دەپ اتاپ ءوتتى ارنولد براۋەر.
ەسكە سالايىق، ببجم – مەكتەپ وقۋشىلارىنىڭ ءبىلىم ساپاسىن زەردەلەيتىن قازاقستاندىق ۇلتتىق زەرتتەۋ، ول وقۋ-تاربيە پروتسەسىندەگى كۇشتى جانە ءالسىز تۇستاردى انىقتاۋعا مۇمكىندىك بەرەدى. ونىڭ تۇپكى ناتيجەسى – ءبىلىم ساپاسىن ارتتىرۋ ءۇشىن ءار وڭىرگە كەشەندى تالداۋ جاساي وتىرىپ، ادىستەمەلىك ۇسىنىستار ازىرلەۋ بولىپ تابىلادى.