قوستاناي قالاسىندا مەملەكەتتىك سۋبسيديالاردى جىمقىرۋ جانە قىلمىستىق جولمەن الىنعان كىرىستەردى زاڭداستىرۋ فاكتىسى بويىنشا ۇكىم شىعارىلدى.
تەرگەۋدى قوستاناي وبلىسى بويىنشا قارجىلىق مونيتورينگ اگەنتتىگىنىڭ دەپارتامەنتى جۇرگىزدى.
ەسكە سالا كەتەيىك، «Beef Export Group» جشس باسشىسى پارحومەنكو جەتەكشىلىك ەتكەن قىلمىستىق توپ اۋىل شارۋاشىلىعى باسقارماسىنىڭ لاۋازىمدى تۇلعالارىنىڭ قاتىسۋىمەن، سونداي-اق اۋداندىق دەڭگەيدەگى اۋىل شارۋاشىلىعى تاۋار وندىرۋشىلەرى مەن ۆەتەريناريالىق ماماندارمەن كەلىسۋ ارقىلى سۋبسيديالاردى زاڭسىز الۋ سحەماسىن ۇيىمداستىرعان.
قاسكويلەر ءىرى قارا مالدى ساتىپ الۋ جانە ونى قايتا وڭدەۋ تۋرالى قۇجاتتاردى جالعان راسىمدەۋ ارقىلى اگروونەركاسىپتىك كەشەندى دامىتۋعا ارنالعان مەملەكەتتىك باعدارلاما اياسىندا جۇيەلى تۇردە سۋبسيديا الىپ وتىرعان.
تۇسكەن قاراجاتتار جالعان جەتكىزىلگەن مال ءۇشىن تولەنگەندەي كورسەتىلىپ، اقپاراتتىق جۇيەلەرگە ەنگىزىلگەننەن كەيىن قولما-قول اقشاعا اينالدىرىلىپ، كەيىن جالعان ءونىم ءۇشىن تولەم رەتىندە باقىلاۋداعى ۇيىمداردىڭ شوتتارىنا قايتا اۋدارىلعان.
ىسكە زاڭدى ءتۇر بەرۋ ماقساتىندا جالعان بۋحگالتەرلىك قۇجاتتار راسىمدەلىپ، ولاردىڭ نەگىزىندە سۋبسيديا الۋعا قايتا وتىنىمدەر بەرىلىپ وتىرعان.
ناتيجەسىندە مەملەكەتكە 3 ملرد تەڭگەدەن استام زالال كەلتىرىلدى.
تەرگەۋ بارىسىندا كۇدىكتىلەر 107 ملن تەڭگەدەن استام قاراجاتتى ەرىكتى تۇردە وتەدى.
ايتا كەتۋ كەرەك، مۇنداي قىلمىستار اگرارلىق سەكتوردى مەملەكەتتىك قولداۋ جۇيەسىنە دەگەن سەنىمدى السىرەتىپ، ادال كاسىپكەرلەردىڭ اۋىل شارۋاشىلىعىن دامىتۋ مۇمكىندىكتەرىن شەكتەيدى.
سوت ۇكىمىمەن ۇيىمداستىرۋشى پارحومەنكو ا.گ. 14 جىلعا باس بوستاندىعىنان ايىرىلدى.
قىلمىستىق توپتىڭ 14 قاتىسۋشىسىنا 6 جىلدان 10 جىلعا دەيىن باس بوستاندىعىنان ايىرۋ جازاسى تاعايىندالدى.
سونىمەن قاتار، جالپى قۇنى 3 ملرد تەڭگە بولاتىن مۇلىك، ونىڭ ىشىندە 1,3 ملن اقش دوللارى جانە 700 ملن تەڭگە تاركىلەندى.
ۇكىم زاڭدى كۇشىنە ەنگەن جوق.