ۇكىمەت وتىرىسىندا بالالاردىڭ جازعى دەمالىسىن ۇيىمداستىرۋ ماسەلەلەرى قارالىپ، تۋريزم جانە سپورت ءمينيسترى ەربول مىرزابوسىنوۆ بالالار-جاسوسپىرىمدەر ءتۋريزمىن دامىتۋعا باعىتتالعان جوبالاردى تانىستىردى.
جازعى كەزەڭدە بالالاردىڭ قاۋىپسىز ءارى مازمۇندى دەمالىسىن ۇيىمداستىرۋ، وتباسىلىق ساياحاتتاردى قولداۋ جانە ىشكى ءتۋريزمدى دامىتۋ نەگىزگى باعىتتاردىڭ ءبىرى رەتىندە ايقىندالدى.
وسى ماقساتتا ەلىمىزدە بالالار مەن اتا-انالارعا ارنالعان سپورتتىق، مادەني جانە تۋريستىك ءىس-شارالار ۇيىمداستىرىلادى. سولاردىڭ ءبىرى – «بۋراباي-2026» جارتاسقا ورمەلەۋ رەسپۋبليكالىق فەستيۆالى.
2026 جىلعا ارنالعان وقيعالار كۇنتىزبەسى اياسىندا جازدا بالالار مەن جاستارعا ارنالعان 20-دان استام ءىرى ءىس-شارا وتكىزۋ جوسپارلانعان. ماۋسىم ايىندا الماتى وبلىسىندا «NomadFest»، قاراعاندى وبلىسىندا «Balkhash Tour Fest» جانە ۇلىتاۋ وبلىسىندا «كوكمايسا» فەستيۆالدەرى وتەدى.
شىلدە ايىندا استانادا «اسىل مۇرا» مادەني-وتباسىلىق ءىس-شاراسى، جەتىسۋ وبلىسىندا «الاكول تولقىنى» جاستار جوباسى جانە اتىراۋ وبلىسىندا ەكولوگيالىق «لوتوس فەستيۆالى» ۇيىمداستىرىلادى.
تامىز ايىندا حالىقارالىق «Comic Con Astana» فەستيۆالى وتەدى. سونىمەن قاتار الماتى وبلىسىندا «بايسەركە اسپانى» وتباسىلىق اۆياتسيالىق فەستيۆالى جانە باسقا دا مادەني-سپورتتىق ءىس-شارالار ۇيىمداستىرىلادى.
بالالار-جاسوسپىرىمدەر ءتۋريزمىن دامىتۋ اياسىندا Kids Go Free باعدارلاماسى جالعاسادى. باعدارلاما بالالاردىڭ اۋە بيلەتتەرىن سۋبسيديالاۋعا باعىتتالعان. باعدارلاما ىسكە قوسىلعالى بەرى 7 مىڭنان استام بالا تەگىن اۋە ساپارىنا شىققان. بيىل تاعى 2 مىڭعا جۋىق بالا وسى مۇمكىندىكتى پايدالانا الادى.
بالالاردىڭ كانيكۋل كەزىندەگى بەلسەندى دەمالىسىن قامتاماسىز ەتۋ ءۇشىن اقمولا وبلىسىنداعى «پارۋس»، شىعىس قازاقستان وبلىسىنداعى «سارىبەل» جانە اباي وبلىسىنداعى الاكول دەمالىس ايماقتارىندا ساۋىقتىرۋ-سپورتتىق لاگەرلەر ۇيىمداستىرىلادى.
قابىلدانىپ جاتقان شارالار بالالاردىڭ جازعى دەمالىسىن قاۋىپسىز ءارى مازمۇندى وتكىزۋگە، ولاردىڭ ەلدىڭ مادەني-تۋريستىك الەۋەتىمەن تانىسۋىنا جانە وتباسىلىق دەمالىستى دامىتۋعا مۇمكىندىك بەرەدى.
@KZgovernment