قر پرەمەر-ءمينيسترىنىڭ كەڭەسشىسى ەرالى توعجانوۆتىڭ، وبلىس اكىمى نۇرلىبەك نالىباەۆتىڭ قاتىسۋىمەن «اۋىل اماناتى» جوباسىنىڭ وڭىردە جۇزەگە اسىرىلۋ بارىسى تالقىلانعان ءماجىلىس ءوتتى.
وعان «AMANAT» پارتياسى وكىلدەرى، وبلىستىق باسقارمالار مەن دەپارتامەنت باسشىلارى، قالا، اۋدان، اۋىلدىق وكرۋگ اكىمدەرى جانە بيزنەس وكىلدەرى قاتىستى.
ايماق باسشىسى وڭىردەگى اۋقىمدى جۇمىستارعا، باستامالار مەن الداعى مىندەتتەرگە توقتالدى.
«پرەزيدەنتىمىز قاسىم-جومارت كەمەلۇلىنىڭ 2022 جىلى قاراشا ايىندا قازاقستان رەسپۋبليكاسى پرەزيدەنتى لاۋازىمىنا كىرىسكەننەن كەيىن ەڭ العاشقى قول قويعان جارلىعى «اۋىلدىق اۋماقتاردى دامىتۋدىڭ 2023-2027 جىلدارعا ارنالعان تۇجىرىمداماسى» بولدى.
اۋىلداردى دامىتۋ – مەملەكەتتىك ساياساتتىڭ ماڭىزدى ستراتەگيالىق ماقساتتارىنىڭ ءبىرى. بۇگىندە ءوڭىرىمىزدىڭ 447 مىڭ تۇرعىنى (وبلىس حالقىنىڭ سانى 845 مىڭ ادام) نەمەسە 53 پايىزى اۋىلدا تۇرادى.
اگروبيزنەس وكىلدەرى بيزنەستىڭ الەۋمەتتىك جاۋاپكەرشىلىگى اياسىندا اۋىلداردىڭ جاعدايىن جاقسارتۋ ءۇشىن اۋقىمدى جۇمىس اتقارۋدا. بۇگىنگى جيىننىڭ باستى ماقساتى – «اۋىل اماناتى» جوباسىن ىسكە اسىرۋداعى نەگىزگى ماسەلەلەردى تالقىلاۋ، ۇسىنىس-پىكىرلەردى ءبولىسۋ»،– دەدى ن.نالىباەۆ.
ماجىلىستە ەرالى توعجانوۆ «اۋىل اماناتى» جوباسىنىڭ نەگىزگى باعىتتارىنا توقتالىپ، وسى جوبا شەڭبەرىندە قىزىلوردا وبلىسىندا اتقارىلعان جۇمىستارعا وڭ باعا بەردى.
وبلىستىق ەكونوميكا جانە قارجى باسقارماسىنىڭ باسشىسى ساكەن مىرزابەك، اۋىل شارۋاشىلىعى جانە جەر قاتىناستارى باسقارماسىنىڭ باسشىسى تالعات دۇيسەباەۆ جانە بيزنەس وكىلدەرى بايانداما جاسادى.
ايتا كەتەيىك، سوڭعى ەكى جىلدا (2023, 2024 جج.) «اۋىل اماناتى» جوباسى اياسىندا 5 ملرد. 500 ملن. تەڭگەگە 782 جوبا ىسكە قوسىلىپ، 1 110 جاڭا جۇمىس ورنى اشىلدى. بيىلعا 5,5 ملرد. تەڭگە ءبولىنىپ، 443 جوبا جوسپارلانعان. الداعى جىلعا 5,6 ملرد. تەڭگەگە 305 جوبا كوزدەلگەن. جالپى 2,2 ملرد. تەڭگەگە 65 كووپەراتيۆ قارجىلاندىرىلماق. بۇگىنگى كۇنگە 23 كووپەراتيۆتىك جوبالار پۋلى جاسالىپ پىسىقتالۋدا.
قىزىلوردا وبلىسى اكىمىنىڭ ءباسپاسوز قىزمەتى