ەرىگەن قار سۋىن اعىزۋ بويىنشا كەشەندى ءىس-شارالار جوسپارى بەكىتىلدى. بۇل ماسەلەلەر اكىمدىكتە وتكەن كەڭەستە تالقىلانىپ، وعان تجد، «قازسۋشار» رمك، «قازگيدرومەت» رمك جانە وزگە دە ۆەدومستۆولىق قۇرىلىمدار قاتىستى.
قالانىڭ كوممۋنالدىق قىزمەتتەرى 38 شاقىرىم ارىق-ناۋا جەلىسىن جانە 16 شاقىرىم نوسەرلى كارىز جۇيەسىن تازارتتى. سونىمەن قاتار 3,3 مىڭعا جۋىق باقىلاۋ جانە جاڭبىر سۋىن قابىلدايتىن قۇدىقتار تازالانىپ، 530 مەتر قۇبىر بۋلاندىرىلىپ تازارتىلدى، 884 توننا لاي شىعارىلدى. بيىل قىس مەزگىلىندە 4,6 ملن تەكشە مەتردەن استام قار قالا سىرتىنا شىعارىلدى.
سۋ تاسقىنىنىڭ الدىن الۋ جانە سالدارىن جويۋ ءۇشىن ينەرتتى ماتەريالدار قورى دايىندالدى. ازاماتتىق قورعاۋ ورگاندارى مەن كوممۋنالدىق قىزمەتتەر تۇراقتى دايىندىق رەجيمىنە كوشىرىلگەن.
«استانا سۋ ارناسى» جەلىسى بويىنشا 170 مەتر قىسىمدى جەلى تارتىلىپ، ديامەترى 400-1600 مم بولاتىن ماگيسترالدىق جەلىلەر تازارتىلۋدا. كارىز-تازارتۋ ستانتسياسىندا (كتس) ساعاتىنا 5-7 مىڭ تەكشە مەتر سۋ ايدايتىن 4 سورعى ورناتىلعان. يندۋستريالىق پارك اۋدانىندا اقبۇلاق وزەنى بويىنىڭ جاعالاۋىن بەكىتۋ، وزەن ارناسىن كەڭەيتۋ جۇمىسى جۇرگىزىلۋدە.
استانا اكىمى جەڭىس قاسىمبەك الەۋمەتتىك نىساندار، جەكەمەنشىك سەكتور جانە ەلدى مەكەندەر اۋماعىنان قاردى ۋاقىتىلى شىعارۋ، سونداي-اق بوگەتتەر مەن گيدروتەحنيكالىق قۇرىلىستاردىڭ جاعدايىن تۇراقتى باقىلاۋدا ۇستاۋ قاجەتتىگىن اتاپ ءوتتى.
سۋ تاسقىنى كەزەڭىنە دايىندىق جوسپارلى تۇردە جۇرگىزىلىپ جاتىر. بارلىق جۇمىس تاۋلىك بويى اتقارىلىپ، تۇراقتى باقىلاۋدا.