استانادا قۇربان ايت مەرەكەسى قارساڭىندا سانيتارلىق-ەپيدەميولوگيالىق جانە ۆەتەرينارلىق قاۋىپسىزدىك شارالارى كۇشەيتىلدى. بيىل قۇربان ايت 27-29 مامىر ارالىعىندا وتەدى. مەرەكە كەزەڭىندە سانيتارلىق نورمالاردى ساقتاۋ، جۇقپالى اۋرۋلاردىڭ الدىن الۋ جانە قۇربان شالۋ ءراسىمىن قاۋىپسىز وتكىزۋ ماسەلەلەرىنە ەرەكشە كوڭىل بولىنەدى، دەپ حابارلايدى ەلوردا اكىمدىگىنىڭ رەسمي سايتى.

قالالىق سانيتارلىق-ەپيدەميولوگيالىق باقىلاۋ دەپارتامەنتىنىڭ مالىمەتىنشە، مال سويۋ تەك ارنايى بەلگىلەنگەن جانە جابدىقتالعان ورىنداردا عانا رۇقسات ەتىلەدى. تۇرعىن ۇيلەردىڭ اۋلاسىندا، كوشەدە، پودەزدەردە جانە باسقا دا قوعامدىق ورىنداردا مال سويۋعا تىيىم سالىنادى.

وسى ماقساتتا ەلوردادا بەس ارنايى الاڭ بەلگىلەنگەن:

بايقوڭىر اۋدانى:

• «شانحاي» بازارى – الاش تاسجولى، 34/6;

• «باراكات» بازارى – ا 369 كوشەسى، 10;

• «جايلاۋ» بازارى – الاش تاسجولى، تس 313 كوشەسى;

• «شاۋشەن» شارۋا قوجالىعى – الاش تاسجولى، 136ب.

الماتى اۋدانى:

• «ەت-حان» ەت تسەحى – تەمىرجولشىلار ەلدى مەكەنى، اقجار كوشەسى، 20.

مال سويىلعان ورىنداردا قالعان قالدىقتار بەلگىلەنگەن تارتىپپەن جويىلۋى قاجەت. ولاردى تۇرمىستىق قالدىق كونتەينەرلەرىنە تاستاۋعا بولمايدى.

تۇرعىندار سانيتارلىق تالاپتاردى ساقتاۋى، قوعامدىق ءتارتىپتى بۇزباۋى جانە قۇربان ايت كەزىندە قاۋىپسىزدىك ەرەجەلەرىنە جاۋاپكەرشىلىكپەن قاراۋى قاجەت.