استانادا قار كۇرەۋ جۇمىسىنا مىڭعا جۋىق ارنايى تەحنيكا جۇمىلدىرىلدى

31 جەلتوقسان كۇنى قالا اۋماعىنان قار پوليگوندارىنا 1 016 جۇك كولىگى ارقىلى 13 مىڭ تەكشە مەتردەن استام قار شىعارىلدى.

1 قاڭتارعا قاراعان ءتۇنى كوشە-جول جەلىسىن تازالاۋ جۇمىسىنا 269 جول جۇمىسشىسى مەن مىڭعا جۋىق ارنايى تەحنيكا جۇمىلدىرىلدى. جۇمىستار نەگىزگى ماگيسترالداردا، كۆارتالىشىلىك جولداردا، تروتۋارلار مەن جاياۋ جۇرگىنشىلەر ايماقتارىندا ءجۇرىپ جاتىر.

قىس ماۋسىمى باستالعالى بەرى قار پوليگوندارىنا جالپى كولەمى 1 390 944 تەكشە مەتر قار شىعارىلدى. بۇل 106 497 جۇك كولىگى رەيسىنە تەڭ.

قالا تۇرعىندارىنىڭ قاۋىپسىز قوزعالىسىن قامتاماسىز ەتۋ ماقساتىندا جولدارعا، تروتۋارلار مەن جاياۋ جۇرگىنشىلەر ايماقتارىنا كوكتايعاققا قارسى ماتەريالدار سەبىلىپ جاتىر.

قىس مەزگىلى باستالعالى بەرى شامامەن 4 000 توننا تەحنيكالىق تۇز قولدانىلدى. قالانى تازالاۋ جانە وڭدەۋ جۇمىسى تاۋلىك بويى ءجۇرىپ جاتىر.

استانا اكىمدىگى قالا تۇرعىندارى مەن قوناقتارىن جولدار مەن تروتۋارلاردا ساق بولۋعا، قاۋىپسىزدىك شارالارىن ساقتاۋعا جانە ساپارعا شىعار الدىن اۋا رايىن ەسكەرۋگە شاقىرادى.