بيىل ەلوردادا 50 مىڭنان استام جۇرگىزۋشى تۇراق ەرەجەسىن بۇزعانى ءۇشىن جاۋاپقا تارتىلدى، – دەپ حابارلايدى Polisia.kz. استانادا كولىكتى توقتاتۋ جانە تۇراققا قويۋ قاعيدالارىن بۇزۋ دەرەكتەرىن انىقتاۋ جانە ولاردىڭ جولىن كەسۋ جۇمىستارى تۇراقتى تۇردە جۇرگىزىلىپ جاتىر. مۇنداي قۇقىق بۇزۋشىلىقتار تۇرعىندارعا ناقتى قولايسىزدىقتار تۋعىزادى، كولىك قوزعالىسىنا كەدەرگى كەلتىرەدى، كىرەبەرىستەرگە، پاندۋستارعا جانە قاجەت جەرگە جەتۋدى قيىنداتادى، ال كەيبىر جاعدايلاردا مۇمكىندىگى شەكتەۋلى ازاماتتار مەن بالالار ارباسىن يتەرگەن اتا-انالاردىڭ ءجۇرىپ-تۇرۋىن شەكتەيدى. قۇقىق بۇزۋشىلىقتار پاترۋلدەۋ بارىسىندا دا، بەينەباقىلاۋ كامەرالارىنىڭ جازبالارىن باقىلاۋ ارقىلى دا انىقتالادى. اسىرەسە تۇرعىن ۇيلەردىڭ اۋلالارىنا، سونداي-اق اكىمشىلىك جانە قوعامدىق عيماراتتاردىڭ ماڭىنداعى اۋماقتارعا ەرەكشە نازار اۋدارىلادى. تەك ءبىر كۇننىڭ ىشىندە استانادا تۇراققا قويۋ قاعيدالارىن بۇزعانى ءۇشىن شامامەن 130 جۇرگىزۋشى جاۋاپقا تارتىلسا، تاعى 140-قا جۋىق جۇرگىزۋشى جول بەلگىلەرى تالاپتارىن ساقتاماعان. انىقتالعان بۇزۋشىلىقتار ءۇشىن 200-دەن استام اۆتوكولىكتىڭ ءنومىرى تاركىلەندى.
انىقتالعان بارلىق دەرەك بويىنشا جۇرگىزۋشىلەر جاۋاپقا تارتىلدى. ولاردىڭ بىرقاتارى بۇعان دەيىن دە وسىنداي قۇقىق بۇزۋشىلىقتارعا جول بەرگەنى انىقتالدى. جىل باسىنان بەرى ەلوردادا تۇراققا قويۋ قاعيدالارىن بۇزعانى ءۇشىن 50 مىڭنان استام جۇرگىزۋشى جازالاندى. ونىڭ ىشىندە 1,5 مىڭنان استامى بۇل قۇقىق بۇزۋشىلىقتى ەكى جانە ودان دا كوپ رەت قايتالاعان. ەگەر ءسىز دۇرىس قويىلماعان كولىككە — ياعني كىرىپ-شىعۋ جولىن جاۋىپ تۇرعان، قوزعالىسقا كەدەرگى كەلتىرەتىن، پاندۋستى نەمەسە تۇرعىن ءۇي كىرەبەرىسىن بوگەيتىن جاعدايعا تاپ بولساڭىز — پوليتسياعا حابارلاسۋ قاجەت. مۇنى "102" ءنومىرى ارقىلى، ازاماتتاردىڭ وتىنىشتەرىن قابىلداۋدىڭ ومنيكانالدى جۇيەسى ارقىلى، سونداي-اق eGov Mobile قوسىمشاسىنداعى "زاڭ مەن ءتارتىپ" سەرۆيسى مەن ەكىنشى دەڭگەيلى بانكتەردىڭ قوسىمشالارى ارقىلى جاساۋعا بولادى. تۇراق ەرەجەلەرىن ساقتاۋ – تەك زاڭدى ورىنداۋ ەمەس. كولىكتى دۇرىس قويماساڭىز، ول باسقا ادامدارعا كەدەرگى كەلتىرەدى. كەيدە بۇل وتە قاۋىپتى بولۋى مۇمكىن، ويتكەنى كەي ساتتە ءار مينۋت ماڭىزدى بولادى.
اقپارات كوزى
Polisia.kz سايتىندا: https://polisia.kz/biyl-elordada-50-myngnan-astam-zhurgizushi-turaq-erezhesin-buzghany-ushin-zhauapqa-tartyldy/اقپارات كوزى Polisia.kz سايتىندا: https://polisia.kz/biyl-elordada-50-myngnan-astam-zhurgizushi-turaq-erezhesin-buzghany-ushin-zhauapqa-tartyldy/