سونىمەن، بيىل ۇركەرلىك 1 000 تۇرعىن ءۇي تابيعي گازعا قوسىلۋ مۇمكىندىگىنە يە بولدى. «ۇركەردەگى العاشقى ابونەنتتەردىڭ گازعا قوسىلۋى، شىن مانىندە، تاريحي ءسات. 2025 - 2026 جىلدارى گازعا وسى جەردەگى بارلىق جەكە ءۇي مەن تۇرعىن ءۇي كەشەنى قول جەتكىزە الادى. گازداندىرۋ ۇيلەردىڭ قاۋىپسىزدىگىن قامتاماسىز ەتەدى. ول ەكولوگيالىق تازا جانە ادامدار ءۇشىن قولجەتىمدى»، دەدى استانا قالاسى نۇرا اۋدانى اكىمىنىڭ ورىنباسارى سارسەنعالي اقجولوۆ. ۇركەردى تولىق گازداندىرۋ ءۇشىن بارلىعى 173 شاقىرىم گاز جەلىسىن سالۋ جوسپارلانعان. قازىرگى ۋاقىتتا جوسپارلانعان جۇمىستاردىڭ شامامەن ۇشتەن ءبىرى اياقتالعان.
تۇرعىن الاپقا تابيعي گاز استانا اكىمدىگى، ەنەرگەتيكا مينيسترلىگى، «Qazaq Gaz Aimaq» اق مەن «Qazaq Zhylu» جشس-ءنىڭ ۇيلەسىمدى جۇمىسىنىڭ ناتيجەسىندە قول جەتكىزىلگەن.
بۇعان دەيىن تاراعان اقپاراتتاردا ەلوردا اكىمدىگى گازداندىرۋدىڭ ەكى كەزەگىنىڭ قۇرىلىسىن اياقتاعانى حابارلانعان ەدى. وسى قۇرىلىس اياسىندا كوكتال-1, كوكتال-2, اگروقالاشىق جانە پوتانين كوشەسى اۋدانىنداعى قالانىڭ ەسكى بولىگىنىڭ تۇرعىندارى تابيعي گازعا قوسىلعان.
الماتى اۋدانىندا تەمىرجولشىلار ۆوكزالى، پرومىشلەننىي، وڭتۇستىك-شىعىس وڭ جانە سول جاعى، كۇيگەنجار، ميچۋرينو، سونداي-اق «اقبيداي»، «قازاقاۋىل» شاعىن اۋداندارىنىڭ تۇرعىندارى تابيعي گازعا قول جەتكىزسە، ەسىل اۋدانىنداعى ۆەللا ۆيلدج، كۋرشاۆەل، Family Town, Family Park تۇرعىن ءۇي كەشەندەرى جانە نۇرا اۋدانىنداعى بۋداپەشت، كوسميك-سيتي تۇرعىن ءۇي كەشەنىنە گاز بەرىلگەن.
استانا قالاسى اكىمدىگىنىڭ حابارلاۋىنشا، «تۇران»، «تەلمان»، «وڭتۇستىك-شىعىس» گاز جىلۋ ستانسالارىنا جانە «ۇركەر»، «پريگورودنىي»، «Family village»، «ءوندىرىس»، «كيرپيچنىي» ەلدى مەكەندەرىن گازبەن قامتۋ جەلىلەرىنىڭ قۇرىلىسى اياقتالعان.