اقمولا وبلىسىنىڭ ەسىل اۋدانىندا جوعالىپ كەتكەن كامەلەتكە تولماعان بالا پوليتسيا قىزمەتكەرلەرىنىڭ جەدەل ارەكەتىنىڭ ارقاسىندا ءبىر ساعات ىشىندە تابىلىپ، اتا-اناسىنا امان-ەسەن قايتارىلدى. اقمولا وبلىسىنىڭ ەسىل اۋدانىندا پوليتسيا قىزمەتكەرلەرىنىڭ ۇيلەسىمدى ءارى جەدەل جۇمىسىنىڭ ناتيجەسىندە ءۇيىنىڭ ماڭىندا جوعالىپ كەتكەن كامەلەتكە تولماعان بالا قىسقا ۋاقىت ىشىندە تابىلىپ، زاڭدى وكىلدەرىنە تاپسىرىلدى.
ەسىل اۋداندىق پوليتسيا بولىمىنە بالانىڭ اكەسى اقجان جۇماسۇلتانوۆ ارنايى كەلىپ، ۇلى نىعمەتجاندى جەدەل ىزدەپ تاۋىپ، امان-ەسەن ۇيىنە قايتارعان ءتارتىپ ساقشىلارىنا شىنايى العىسىن ءبىلدىردى. اكەسىنىڭ ايتۋىنشا، بالا ءۇيدىڭ جانىندا ويناپ جۇرگەن كەزدە ەرەسەكتەردىڭ نازارىنان تىس قالىپ، ءىز-ءتۇزسىز كەتكەن. وقيعا تۋرالى حابار تۇسكەن بويدا پوليتسيا قىزمەتكەرلەرى ىزدەستىرۋ جۇمىستارىن باستاپ كەتتى. ىزدەستىرۋگە پاترۋلدىك پوليتسيا قىزمەتكەرلەرى، كامەلەتكە تولماعاندار ىستەرى جونىندەگى ينسپەكتورلار، ۋچاسكەلىك پوليتسيا ينسپەكتورلارى جانە جەدەل قىزمەتكەرلەر جۇمىلدىرىلدى. بارلىق جەكە قۇرامنىڭ ۇيلەسىمدى ءىس-قيمىلىنىڭ ناتيجەسىندە ءبىر ساعاتتىڭ ىشىندە بالانىڭ جۇرگەن جەرى انىقتالدى. بالا ءدىن امان تابىلىپ، اتا-اناسىنا تاپسىرىلدى. بالانىڭ اتا-اناسى پوليتسيا قىزمەتكەرلەرىنىڭ كاسىبيلىگىنە، جەدەلدىگىنە جانە جاۋاپكەرشىلىگىنە ريزاشىلىقتارىن ءبىلدىرىپ، كورسەتىلگەن كومەك ءۇشىن العىس ايتتى. پوليتسيا اتا-انالارعا بالالاردىڭ قاۋىپسىزدىگى ەڭ الدىمەن ەرەسەكتەردىڭ قىراعىلىعىنا بايلانىستى ەكەنىن ەسكە سالادى. ءتارتىپ ساقشىلارى كامەلەتكە تولماعانداردى قاراۋسىز قالدىرماۋعا، ولارعا قاۋىپسىزدىك ەرەجەلەرىن ءتۇسىندىرىپ، قايدا جانە كىممەن جۇرگەنىن ۇنەمى باقىلاۋدا ۇستاۋعا شاقىرادى. سونداي-اق پوليتسيا بالا جوعالعان جاعدايدا ۋاقىت جوعالتپاي، بىردەن 102 ارناسىنا حابارلاسۋدىڭ ماڭىزدىلىعىن اتاپ وتەدى. سەبەبى مۇنداي جاعدايدا ءاربىر مينۋتتىڭ ماڭىزى زور، ال دەر كەزىندە بەرىلگەن اقپارات ىزدەستىرۋ جۇمىستارىن جەدەل ۇيىمداستىرىپ، بالانى امان-ەسەن تابۋعا مۇمكىندىك بەرەدى.
اقپارات كوزى Polisia.kz سايتىندا: https://polisia.kz/aqmola-oblysynda-politsejler-zhoghalghan-balany-bir-saghat-ishinde-tapty/