مەملەكەت باسشىسى قاسىم-جومارت توقاەۆتىڭ اگروونەركاسىپ كەشەنىن دامىتۋ جونىندەگى تاپسىرمالارىن جۇزەگە اسىرۋ شەڭبەرىندە قازاقستان رەسپۋبليكاسى ۇكىمەتى قر اۋىل شارۋاشىلىعى مينيسترلىگى مەن «ازيا التىن ءدان» جشس اراسىندا اقمولا وبلىسىندا استىقتى تەرەڭ وڭدەۋ زاۋىتىن سالۋ جوباسى بويىنشا ينۆەستيتسيالار تۋرالى كەلىسىمگە قول قويۋدى ماقۇلدادى. پرەمەر-مينيستر ولجاس بەكتەنوۆ ءتيىستى قاۋلىعا قول قويدى.
استىقتى تەرەڭ وڭدەيتىن زاماناۋي جوعارى تەحنولوگيالىق زاۋىت Aqmola يندۋستريالىق ايماعىندا 500 گەكتار اۋماقتا سالىنىپ جاتىر. ول اگروونەركاسىپ كەشەنىنىڭ وڭدەۋ سەكتورىنداعى ەڭ ءىرى كاسىپورىنداردىڭ بىرىنە اينالادى، ال جوبانىڭ باستى ەرەكشەلىگى – ونىڭ اۋقىمى مەن استىقتى بيوتەحنولوگيالىق ءارى قالدىقسىز وڭدەۋگە باعىتتالۋى.
جالپى ينۆەستيتسيا كولەمى 300 ملرد تەڭگە، كاسىپورىننىڭ ءوندىرىس قۋاتى جىلىنا 6 ملن تونناعا دەيىن جەتەدى.
ەكونوميكالىق اسەرى كەشەندى بولادى دەپ كۇتىلۋدە. جوبا استىقتى تولىق تسيكلمەن وڭدەۋدى جانە جوعارى قوسىلعان قۇنى بار ونىمدەر شىعارۋدى كوزدەيدى — ۇن جانە جارما ونىمدەرىنەن باستاپ اۋىل شارۋاشىلىعى جانۋارلارىنا ارنالعان دايىن جەمگە دەيىن. ونى ىسكە اسىرۋ ەكسپورت قۇرىلىمىن ارتاراپتاندىرۋعا، جەرگىلىكتى شيكىزاتتى پايدالانۋ دەڭگەيىن ارتتىرۋعا جانە ەلدىڭ يمپورتقا تاۋەلدىلىگىن ايتارلىقتاي تومەندەتۋگە مۇمكىندىك بەرەدى.
جوبانى ىسكە اسىرۋ ءوڭىردىڭ الەۋمەتتىك-ەكونوميكالىق دامۋىنا ەلەۋلى اسەر ەتەدى. كاسىپورىندا شامامەن 800 جاڭا جۇمىس ورنى اشىلادى. كەلىسىم اياسىندا ينۆەستور بىلىكتى تەحنيكالىق ماماندار مەن بيوينجەنەريا سالاسىنداعى كادرلاردى دايارلاۋ مىندەتىن وزىنە الادى — جىلدا 40 ادامعا دەيىن. دايىندىق ۇزدىكسىز ءبىلىم بەرۋ جۇيەسىن ەنگىزۋ ارقىلى، ونىڭ ىشىندە شەتەلدىك تاعىلىمدامالار مەن حالىقارالىق الماسۋ باعدارلامالارىن قامتي وتىرىپ جۇزەگە اسىرىلادى.
زاۋىت بازاسىندا زاماناۋي عىلىمي-زەرتتەۋ جانە تەحنولوگيالىق زەرتحانا قۇرۋ جوسپارلانىپ وتىر. سونىمەن قاتار ينۆەستور يندۋستريالىق ايماقتىڭ سىرتقى ينجەنەرلىك-كوممۋنيكاتسيالىق ينفراقۇرىلىمىن دامىتۋعا قوسىمشا قاراجات بولەدى.
كاسىپورىن پايدالانۋعا بەرىلگەننەن كەيىن الداعى ۋاقىتتا استانا – قاراعاندى اۆتوماگيسترالىندە جولايىرىعى بار وتكەل، سونداي-اق ماگيسترالدىق تەمىرجول ارقىلى يندۋستريالىق ايماققا اپاراتىن اۆتوموبيل جولىن سالۋ كوزدەلگەن.
ينۆەستور اۋداننىڭ الەۋمەتتىك ينفراقۇرىلىمىن دامىتۋعا دا بەلسەندى قاتىسۋدى جوسپارلاپ وتىر. جوبا تولىق ىسكە قوسىلعاننان كەيىن جىل سايىن ءبىلىم بەرۋ، مادەنيەت، بۇقارالىق سپورت، جاستار ساياساتى جانە دەنساۋلىق ساقتاۋ سالالارىنداعى الەۋمەتتىك باستامالاردى قولداۋعا قارجى بولىنەدى.
سونىمەن قاتار كاسىپورىن ىسكە قوسىلعاننان كەيىنگى ەكى جىل ىشىندە ءجۇزۋ باسسەينى مەن جەكپە-جەك زالدارى بار كوپفۋنكتسيونالدى سپورتتىق-ساۋىقتىرۋ كەشەنى سالىنادى. بۇل كەشەن بارلىق تۇرعىندارعا قولجەتىمدى بولادى.
جالپى زاۋىتتىڭ ىسكە قوسىلۋى ەلىمىزدىڭ ازىق-تۇلىك جانە ەكونوميكالىق قاۋىپسىزدىك دەڭگەيىن ارتتىرادى، ەكسپورت قۇرىلىمىنداعى وڭدەلگەن ءونىم ۇلەسىن كوبەيتەدى جانە قازاقستاننىڭ شيكىزات ەمەس، جوعارى تەحنولوگيالىق اگروونەركاسىپتىك ءونىم جەتكىزۋشى رەتىندەگى پوزيتسياسىن نىعايتادى.