الماتى قالاسى اكىمدىگىنىڭ قولداۋىمەن 18 شىلدە، سەنبى كۇنى Summer Relay جازعى كەشكى ەستافەتاسى وتەدى. بيىل جارىس العاش رەت قالانىڭ تاريحي ورتالىعى ارقىلى وتەتىن جاڭا باعىتتا ۇيىمداستىرىلادى. وسىعان بايلانىستى قالانىڭ بىرقاتار ورتالىق كوشەسىندە كولىك قوزعالىسىنا ۋاقىتشا شەكتەۋ ەنگىزىلەدى.
جارىستىڭ سورەسى مەن مارەسى «استانا» الاڭى. ەستافەتا باعىتى تولە بي، قابانباي باتىر، پانفيلوۆ كوشەلەرى جانە ابىلاي حان داڭعىلى ارقىلى وتەدى. بەس ادامنان تۇراتىن كوماندالار جالپى ۇزىندىعى 10 شاقىرىم بولاتىن ەستافەتالىق قاشىقتىقتى باعىندىرادى. ال جاس قاتىسۋشىلار ءۇشىن 500, 1000 جانە 2000 مەتر قاشىقتىقتارعا جۇگىرۋ جارىستارى ۇيىمداستىرىلادى.
جارىس باعىتى تولە بي، قابانباي باتىر، پانفيلوۆ كوشەلەرى مەن ابىلاي حان داڭعىلى ارقىلى وتەدى. قاتىسۋشىلار قازاقستان جازۋشىلار وداعىنىڭ عيماراتى، قۇرمانعازى اتىنداعى قازاق ۇلتتىق كونسەرۆاتورياسى، «الماتى» قوناق ءۇيى، جامبىل جاباەۆ ەسكەرتكىشى، اباي اتىنداعى قازاق مەملەكەتتىك اكادەميالىق وپەرا جانە بالەت تەاترى، سونداي-اق تەمىربەك جۇرگەنوۆ ەسكەرتكىشىنىڭ جانىنان جۇگىرىپ وتەدى.
جارىسقا بايلانىستى كولىك قوزعالىسىنا مىناداي ۋاقىتشا شەكتەۋ ەنگىزىلەدى:
* 18 شىلدە ساعات 09:00-دەن 19 شىلدە ساعات 06:00-گە دەيىن – تولە بي كوشەسىندە (پانفيلوۆ كوشەسىنەن ابىلاي حان داڭعىلىنا دەيىن);
* 18 شىلدە ساعات 20:00-دەن 23:00-گە دەيىن – ابىلاي حان داڭعىلىندا (تولە بي كوشەسىنەن قابانباي باتىر كوشەسىنە دەيىن);
* 18 شىلدە ساعات 20:00-دەن 23:00-گە دەيىن – قابانباي باتىر كوشەسىندە (ابىلاي حان داڭعىلىنان نازارباەۆ داڭعىلىنا دەيىن);
* 18 شىلدە ساعات 20:00-دەن 23:00-گە دەيىن – پانفيلوۆ كوشەسىندە (قابانباي باتىر كوشەسىنەن تولە بي كوشەسىنە دەيىن).
ۋاقىتشا شەكتەۋلەر جارىستىڭ قاۋىپسىز ءوتۋىن قامتاماسىز ەتۋ جانە قاتىسۋشىلاردىڭ قاشىقتىقتى كەدەرگىسىز ەڭسەرۋى ءۇشىن ەنگىزىلەدى.
مارەگە جەتكەن بارلىق قاتىسۋشىعا ەستەلىك مەدال تابىستالادى. ءار سانات بويىنشا جۇلدەگەر اتانعان كوماندالار مۇسىنشەلەرمەن جانە سەرىكتەستەردىڭ سىيلىعىمەن ماراپاتتالادى. ال PRO جانە Business ساناتتارىنىڭ جەڭىمپازدارىنا اقشالاي سەرتيفيكات بەرىلەدى.
جارىس باعدارلاماسى ساعات 18:00-دە بالالار جارىسىمەن باستالادى. ساعات 20:00-دە 2 شاقىرىمدىق جۇگىرۋ، ال 21:00-دە Summer Relay نەگىزگى ەستافەتاسى وتەدى.
ءىس-شارانى الماتى قالاسى اكىمدىگىنىڭ قولداۋىمەن «ءبىرىنشى بولۋ باتىلدىق» كورپوراتيۆتىك قورى، Krida فيتنەس-كلۋبى جانە اكادەميك ش. ەسەنوۆ اتىنداعى عىلىمي-ءبىلىم بەرۋ قورى ۇيىمداستىرادى.
ۇيىمداستىرۋشىلار قالا تۇرعىندارى مەن قوناقتارىنا كولىك قوزعالىسىنا ەنگىزىلەتىن ۋاقىتشا شەكتەۋدى ەسكەرىپ، باعىتىن الدىن الا جوسپارلاۋعا كەڭەس بەرەدى.