اعىمداعى جىلعى 7 ماۋسىمدا وبلىس اكىمىنىڭ ورىنباسارى ارداق زەبەشەۆ، وبلىس اكىمىنىڭ ورىنباسارى، قازاقستان رەسپۋبليكاسى پرەزيدەنتىنىڭ «بايقوڭىر» كەشەنىندەگى ارناۋلى وكىلى قايرات نۇرتاي، قالا اكىمى نۇرجان احاتوۆ قىزىلوردا قالاسىنا ارنايى كەلگەن الەمگە تانىمال بلوگەرلەر داستان مۇحامەدراحىم مەن دجو حاتتابقا (HATAB JEHAD JAMAL TAWFIQ) قايتا جاڭعىرتىلعان پرەزيدەنت ساياباعىن تانىستىردى.
قالا تۇرعىندارى مەن قوناقتارىنىڭ سۇيىكتى دەمالىس ورىندارىنىڭ بىرىنە اينالعان پرەزيدەنت ساياباعىنىڭ اۋماعىندا زاماناۋي سۋبۇرقاقتار، امفيتەاتر، سپورت جانە ويىن الاڭدارى، بي جانە شاحمات ايماقتارى، باسكەتبول مەن فۋتبول الاڭدارى ورنالاسقان. سونداي-اق مۇندا بيىكتىگى 50 مەترلىك اينالمالى شولۋ دوڭگەلەگى، ۆەلوسيپەد جانە جۇگىرۋ جولاقتارى، سانيتارلىق پۋنكتتەر سالىنعان.
جالپى اۋماعى 31 گەكتار ساياباققا 2 مىڭنان استام اعاش، 50 مىڭنان استام ساندىك بۇتا جانە 17 ءتۇرلى كوپجىلدىق گۇل ەگىلگەن.
ساياباق اۋماعىن ءتيىمدى پايدالانۋ ماقساتىندا بىرقاتار ماڭىزدى جوبا جۇزەگە اسىرىلۋدا. اتاپ ايتقاندا، 300 ورىندىق زاماناۋي بالالار لاگەرى مەن بوتانيكالىق ءبىلىم بەرۋ ورتالىعى پايدالانۋعا بەرىلگەن. سونىمەن قاتار 8,2 گەكتار اۋماقتا توعىز قاباتتى 15 تۇرعىن ءۇي سالىنىپ جاتىر. بۇدان بولەك، 200 توسەكتىك جاڭا پەريناتالدىق ورتالىق، جاڭا دراما تەاتر جانە زاماناۋي پرەزيدەنتتىك كىتاپحانا بوي كوتەرۋدە.
كەزدەسۋدە قوناقتارعا ءوڭىردىڭ تۋريستىك الەۋەتى، قىزىلوردانىڭ الەۋمەتتىك-ەكونوميكالىق دامۋ قارقىنى جانە قالاداعى اۋقىمدى ينفراقۇرىلىمدىق جوبالار تانىستىرىلدى.
ايتا كەتەيىك، دجو حاتتاب – حالىقارالىق دەڭگەيدە كەڭىنەن تانىلعان اراب ترەۆەل-دوكۋمەنتاليسى، رەجيسسەر، بەينەگراف جانە YouTube بلوگەرى. قازىرگى ۋاقىتتا ونىڭ الەۋمەتتىك جەلىلەردەگى جالپى اۋديتورياسى 25 ميلليوننان اسادى.
ول جاي عانا تۋريستىك ورىنداردى تانىستىراتىن بلوگەر ەمەس، دەرەكتى فيلمدەر تۇسىرەتىن كونتەنت اۆتورى رەتىندە تانىمال. شىعارماشىلىعىنىڭ نەگىزگى باعىتى – سيرەك مادەنيەتتەر مەن الەمنىڭ شالعاي وڭىرلەرىندەگى ادامداردىڭ ءومىرىن كورسەتۋ. دجو حاتتاب ەۆەرەست تاۋلارىنداعى شەرپالاردىڭ تۇرمىسى، امازونكا دجۋنگليلەرىندەگى تايپالاردىڭ ءومىر سالتى، سونداي-اق الەمدەگى ەڭ وقشاۋلانعان مەملەكەتتەردىڭ ءبىرى سانالاتىن سولتۇستىك كورەيا مەن كۋبا تۋرالى بىرەگەي جوبالار ازىرلەگەن.
سونىمەن قاتار ول ءتۇرلى ەلدەردەگى ەرەكشە كاسىپ يەلەرىنىڭ ءومىرىن، تاعدىرلى ادامداردىڭ وقيعالارىن جانە ەكولوگيا، كەدەيلىك سەكىلدى جاھاندىق ماسەلەلەردى ارقاۋ ەتكەن دەرەكتى فيلمدەرىمەن تانىلعان. بلوگەردىڭ Joe Hattab Production جەكە مەديا وندىرىستىك كومپانياسى جۇمىس ىستەيدى. ول ءتۇسىرىلىم بارىسىندا ەڭ زاماناۋي تەحنيكالار مەن درونداردى پايدالانىپ، بەينەماتەريالدارىنا كينەماتوگرافيالىق ستيل بەرەدى.
دجو حاتتاب حالىقارالىق دەڭگەيدەگى بىرقاتار ءىرى كومپانيالاردىڭ، اتاپ ايتقاندا Sony, Emirates, Samsung, Facebook جانە Google برەندتەرىنىڭ رەسمي امباسسادورى بولعان. ونىڭ قازاقستان، ساۋد ارابياسى جانە جاپونيا تۋرالى تۇسىرگەن بەينەجوبالارى حالىقارالىق اۋديتوريانىڭ قىزىعۋشىلىعىن ارتتىرىپ، اتالعان ەلدەرگە شەتەلدىك تۋريستەر اعىنىنىڭ كوبەيۋىنە ىقپال ەتكەن.
الداعى ەكى كۇندە تانىمال بلوگەرلەر قارماقشى اۋدانىنداعى قورقىت اتا مەموريالدىق كەشەنىنە بارماق. سونداي-اق، بايقوڭىر عارىش ايلاعىندا دەرەكتى فيلم ءتۇسىرۋدى جوسپارلاۋدا.
قىزىلوردا وبلىسى اكىمىنىڭ ءباسپاسوز قىزمەتى