Oblys äkımı Nūrlybek Nälıbaev, Densaulyq saqtau ministrı Aqmaral Älnazarova, Parlament Mäjılısınıŋ deputattary Mūrat Äbenov, Marhabat Jaiymbetov, Mūrat Ergeşbaev bır auysymda 100 keluşını qabyldaityn emhanasy bar 300 tösektık köpbeiındı auruhananyŋ (onkologiialyq bölımşesımen) qūrylys alaŋyna baryp, jūmys barysymen tanysty.
Oblys tūrǧyndary üşın asa maŋyzdy äleumettık nysan Memleket basşysynyŋ tapsyrmasymen salynuda. Auruhana zamanaui tehnikalyq şeşımderdı eskerıp jobalanǧan, eŋ ozyq tehnologiiamen qamtamasyz etıledı. Diagnostika jäne emdeu boiynşa zamanaui standarttarǧa sai keletın joǧary tehnologiialyq innovasiialar engızıledı, būl medisinalyq kömektıŋ sapasy men qoljetımdılıgın arttyrady. Osylaişa Qyzylordada şeteldık klinikalardan eş kem tüspeitın zamanaui medisinalyq keşen paida bolady.
«Meliorator» serıktestıgı qolǧa alǧan jobaǧa 36 mlrd 416 mln teŋge qarjy qaralǧan. Būl – aimaqtaǧy halyqaralyq standarttarǧa sai, eŋ auqymdy jobalardyŋ bırı. Aumaǧy 57 myŋ şarşy metr, 7 gektar jerge ornalasqan. Nysan 10 bloktan tūrady: emhana, pansionat, konferens-zal, ashana, fizioterapiia, qabyldau bölımı, äkımşılık, reanimasiia, himioterapiia jäne radioterapiia, operasiialyq bölım.
Qūrylysy ekı jyl būryn bastalǧan ǧimaratty salu barysynda osy uaqytqa deiın 21 mlrd. teŋge qarajat igerılıp, jūmystyŋ 70 paiyzy eŋserıldı. Qalǧan 16 mlrd. teŋge osy jyly respublikalyq jäne oblystyq biudjetten bölıngen. Qazırgı taŋda beton jūmystary tolyq bıtken, al kırpış qalau aiaqtalyp qaldy.
Jaqyn arada qūrylysşylar terezesın salyp, qasbetın bastaidy. Sonymen qatar, jylu qūbyrlary ornatylyp, qajettı toraptarǧa qosyluda. Elektr jelısı tartylyp, taratu nüktelerı daiyndaldy. Qūrylys kestege säikes jürgızılude. Jospar boiynşa küşeitılgen jūmys rejimıne köşıp, jyl soŋyna deiın qūral-jabdyqtaryn ornatyp, paidalanuǧa beredı.
Bügınde qūrylys basynda 200-ge juyq adam, 15 tehnika bar. Gazoblog, injenerlık jüielerge qajettı materialdar jetkılıktı.
Aita keteiık, Memleket basşysynyŋ tapsyrmasyna säikes 12 oblysta zamanaui perinataldyq ortalyqtar salu közdelgen. Bügın Qyzylorda qalasynda halyqaralyq täjıribe men ozyq medisinalyq tehnologiialar engızıletın 200 tösektık perinataldyq ortalyqtyŋ ırgetasy qalandy. Nysanǧa 2,7 gektar jer telımı bölınıp, 48,8 mlrd teŋge qarajat qaralǧan.
Qyzylorda oblysy äkımınıŋ baspasöz qyzmetı