Oblys äkımı Nūrlybek Nälıbaev, Densaulyq saqtau ministrı Aqmaral Älnazarova, Parlament Mäjılısınıŋ deputattary Mūrat Äbenov, Marhabat Jaiymbetov, Mūrat Ergeşbaev, qūqyq qorǧau organdarynyŋ bırınşı basşylary, mäslihat deputattary, ziialy qauym ökılderı, el aǧalarynyŋ arnaiy qatysuymen Titov qystaǧyndaǧy 400 oryndyq jaŋa emhananyŋ ırgetasyn qalau räsımı öttı.
Aimaq basşysy jinalǧan jūrtşylyqty jaŋa nysan qūrylysynyŋ bastaluymen qūttyqtap, densaulyq salasyndaǧy atqarylǧan jūmystardy atap öttı.
«Memlekettıŋ eŋ basty bailyǧy – adam, adamdaǧy bailyqtyŋ negızısı – densaulyq. Dennıŋ saulyǧy – memlekettıŋ damuy men örkendeuınıŋ arqauy.
Prezidentımızdıŋ äleumettık saiasattaǧy basym baǧyttarynyŋ bırı de – halyqqa qoljetımdı ärı sapaly medisinalyq qyzmet ūsynu. Bügın bız Qyzylorda qalasy üşın, sonyŋ ışınde Titov möltek audanynyŋ 40 myŋnan astam tūrǧyndary üşın asa maŋyzdy, tarihi sättıŋ basynda tūrmyz.
Auysymyna 400 keluşıge arnalǧan №5 qalalyq emhananyŋ jaŋa ǧimaratynyŋ ırgetasyn qalau räsımıne kuä boluǧa jinaldyq. Jalpy 9 mlrd. 823 mln. teŋgege salynatyn jaŋa emhana ǧimaratynyŋ aumaǧy 9 myŋ şarşy metr, zamanaui talaptarǧa sai joǧary sapaly tehnologiialarmen jabdyqtalady.
Būl – ana men bala ömırın saqtauǧa, qazynaly qarttarymyzdyŋ densaulyǧyn jaqsartuǧa baǧyttalǧan memleket qoldauy. Aldaǧy uaqytta da öŋır halqynyŋ ömır sapasyn arttyruǧa arnalǧan keşendı jūmystar jalǧasady», – dedı N.Nälıbaev.
Is-şarada Aqmaral Şärıpbaiqyzy, Marhabat Jaiymbetūly qūttyqtau söz alyp, Qyzylorda oblysynyŋ qūrmettı azamaty Tūrǧanbai Mahanūly bata berdı.
Aita keteiık, 2022-2025 jyldary öŋırde 26 mlrd 400 mln. teŋgege 40 medisinalyq nysan salynyp, paidalanuǧa berılgen. «Auylda densaulyq saqtaudy jaŋǧyrtu» ūlttyq jobasymen 10 mlrd 700 mln. teŋgege boi kötergen 28 nysan bügınde halyq igılıgıne ainaldy. Sonymen qatar, auyl tūrǧyndaryna şūǧyl medisinalyq kömek körsetu üşın 9 mlrd 900 mln. teŋgege 6 joba ıske asyryldy.
Aral, Qazaly, Şielı, Jaŋaqorǧan audandyq köpbeiındı auruhanalary janynan qosymşa qūrylystar, Şielı men Aral audanyndaǧy jūqpaly aurular bölımşelerıne arnap jaŋa ǧimarattar salyndy.
Jergılıktı biudjet esebınen Jaŋaqorǧan audanyndaǧy Tömenaryq auylynda 15 tösektık auyldyq auruhana men ambulatoriia, Aral audanynyŋ Sekseuıl kentınde 40 tösektık auyldyq auruhana, oblystyq qan ortalyǧy paidalanuǧa berıldı.
Qyzylorda oblysy äkımınıŋ baspasöz qyzmetı