Qyzylorda oblysynyŋ äkımı Mūrat Ergeşbaev Qazaly audany Qojabaqy auylyndaǧy jaŋa dene şynyqtyru-sauyqtyru keşenınıŋ aşylu räsımıne qatysty.
Saltanatty şarada aimaq basşysy tūrǧyndardy qūttyqtap, eldı mekenderde käsıbi jäne būqaralyq sportty damytudyŋ maŋyzdylyǧyn atap öttı.
«Barşaŋyzdy sport keşenınıŋ aşyluymen şyn jürekten qūttyqtaimyn!
Memleket basşysy Qasym-Jomart Kemelūly: «Auyl – bızdıŋ altyn besıgımız. Auyldaǧy tırşılık sapasyn jaqsartpai, jalpyūlttyq damudy elestetu mümkın emes» degen bolatyn.
Bügın Özderıŋızben bırge «Auyl – el besıgı» baǧdarlamasy aiasynda Qojabaqy auylynda salynǧan jaŋa dene şynyqtyru-sauyqtyru keşenın aşuǧa jinaldyq. Bır künde 100 adamdy qabyldauǧa qauqarly zamanaui keşende boks, grek-rim küresı, voleibol, futbol jäne basketbol syndy sport türlerımen ainalysuǧa bolady. Būl auyl jastarynyŋ būqaralyq sportpen tūraqty şūǧyldanuyna, salauatty ömır saltyn qalyptastyruǧa, bolaşaq chempiondardy tärbieleuge jol aşady dep senemın.
Aldaǧy uaqytta da halqymyzdyŋ igılıgıne, tūrǧyndarymyzdyŋ jaily tūrmys-tırşılıgıne, jastarymyzdyŋ jarqyn bolaşaǧyna baǧyttalǧan jaŋa jobalarymyz jalǧasa beredı», - dedı oblys äkımı.
Aita keteiık, Memleket basşysynyŋ, Ükımettıŋ qoldauymen 2022 jyldan berı öŋırde 200-den astam äleumettık nysan boi köterdı. Onyŋ 27-sı - sport keşenı, bügınde el igılıgıne ainaldy. Būdan bölek, Qyzylorda qalasynda 11 myŋ oryndyq «Qaisar Arena» stadiony, «Tennis ortalyǧy» , İnkliuzivtı sport keşenı paidalanuǧa berıldı.
«Qazaqstan halqyna» qoǧamdyq qorynyŋ qoldauymen Şielı, Jalaǧaş audandarynda jaŋa sport keşenderı aşyldy.
Jergılıktı käsıpkerlerdıŋ demeuşılıgımen 80 sport-oiyn alaŋy salyndy.
Bügınde oblys ortalyǧynda «Qyzylorda Arena» köpbeiındı sport keşenınıŋ, «Qaisar» futbol kluby akademiiasynyŋ qūrylysy qarqyn aldy.
Qyzylorda oblysy äkımınıŋ baspasöz qyzmetı