Meiırjan Bauyrūly eşqandai dıni qyzmet atqarmaǧan jäne meşıtte naib imam bolyp jūmys ıstemeidı. Almaty oblysynyŋ Ile audanyndaǧy «Säbdenūly Ötegen batyr» meşıtınıŋ naib imamy Tamaşbekov Marselge «Jazera travel» kompaniiasynyŋ basşysy Meiırjan Bauyrūly ūmra saparyna niet etken jandarǧa därıs ötıp beru jönınde ötınış jasaǧan. Naib imam dıni qūlşylyqty tüsındıru maqsatynda ötınışterın qabyl alyp, ekı ret sabaq ötkızgen. Därıs soŋy sūraq-jauap negızınde jalǧasyp, naib imam «Jazera travel» kompaniiasynyŋ qyzmetı jaily bılgen aqparattarymen de bölısken.
«Jazera travel» kompaniiasyna qatysty dauly mäsele qūqyq qorǧau organdary tarapynan tekserılude. Naib imamnyŋ atalmyş mäselege qatysy bar-joǧy anyqtalu üstınde. Osy rette būqaralyq aqparat qūraldary ökılderın tekserılmegen mälımetterdı taratpauyn sūraimyz.
Aita keteiık, soŋǧy kezde qoǧamda ūmra saparyn ūiymdastyruşy keibır turfirmalardyŋ kümändı ıs-äreketterıne qatysty şaǧymdar köbeiude. Osy oraida ūmraǧa baratyn azamattarǧa qyzmet körsetu, olardyŋ qauıpsızdıgın qamtamasyz etu atalmyş turfirmalar jauapkerşılıgınde ekenın eske salamyz. QR syrtqy turizmdı retteitın tiıstı zaŋnamasyna sai ūmra saparyn toppen ūiymdastyru üşın mındettı türde memlekettık lisenziiasy boluy tiıs jäne är ūmra jasauşyǧa turoperator tarapynan turkod berıluı qajet.
Mūndai talaptar oryndalmaǧan jaǧdaida ūmrany toppen ūiymdastyru QR zaŋdaryna qaişy. Osy rette ūmraǧa aparuşy turfirmalardyŋ qyzmetın qadaǧalauǧa Dıni basqarmanyŋ zaŋdy qūzıretı joq ekendıgın jetkızemız. Sonymen qatar otandastarymyzdy resmi turoperatorlyq lisenziiasy joq turkompaniialarmen ūmra saparyna barmauǧa şaqyramyz.
QMDB Qajylyq bölımı