Memleket basşysy Şanhai yntymaqtastyq ūiymynyŋ sammitıne qatysuǧa şaqyrudy zor yqylaspen qabyl alǧanyn jetkızdı.
-Bız Sızdıŋ elıŋızdıŋ osy ūiymǧa töraǧalyq etuın tolyq qoldaimyz. Ūiymnyŋ kün tärtıbınde tūrǧan mäselelerdı talqylau jūmysyna belsene atsalysyp jatyrmyz. Sondai-aq Sızdı Ekınşı düniejüzılık soǧystaǧy Jeŋıs pen Qytaidyŋ japon basqynşylyǧyna qarsy soǧystaǧy jeŋısınıŋ 80 jyldyǧymen qūttyqtaimyn. Sızdıŋ elıŋız faşizmdı jeŋuge ölşeusız üles qosty. Qytai halqy soǧys jyldarynda naǧyz batyldyq, şynaiy otanşyldyq, qaitpas qaisarlyqtyŋ ozyq ülgısın körsettı. Mūny bärı jaqsy bıledı jäne joǧary baǧalaidy, – dedı Memleket basşysy.
Qazaqstan Prezidentı QHR Töraǧasy Si Szinpinnıŋ tıkelei qoldauymen qazaq-qytai qatynasy būryn-soŋdy bolmaǧan qarqynmen damyp jatqanyn zor rizaşylyqpen atap öttı. Būl bailanys mäŋgılık ärı jan-jaqty strategiialyq serıktestık ruhynda nyǧaiuda. Byltyr ekı el arasyndaǧy tauar ainalymy 44 milliard dollarǧa jettı. Būl – eŋ joǧary körsetkış.
-Osy oŋ ürdıs biyl da saqtalyp otyr. Qytai – Qazaqstannyŋ eŋ ırı sauda serıktesı. Ortaq ırı jobalarymyz jüzege asyrylyp jatyr. Men osy saparymnyŋ aiasynda Qazaq-qytai ıskerlık keŋesınıŋ otyrysyna qatysamyn. Qytaidyŋ bırqatar ırı kompaniiasynyŋ basşylarymen kezdesemın. Biyl Qazaqstanda Qytai turizmı jyly ekenın erekşe köŋılmen atap ötkım keledı. Ekı eldıŋ mädeni-gumanitarlyq yqpaldastyǧyn nyǧaituǧa qolaily jaǧdai jasalǧan. Sonyŋ jarqyn mysaly – Qazaqstanda «Lu Ban zerthanasynyŋ» ekınşı jäne üşınşı filialdary aşylatyn boldy. Beijıŋ qalasynda Qazaqstannyŋ mädeniet ortalyǧyn aşu turaly şeşımıŋız üşın Sızge zor alǧys aitamyn, – dedı Prezident.
Öz kezegınde QHR Töraǧasy Si Szinpin Şanhai yntymaqtastyq ūiymynyŋ sammitıne jäne Ekınşı düniejüzılık soǧystaǧy Jeŋıstıŋ 80 jyldyǧyna arnalǧan saltanatty ıs-şaralarǧa qatysuǧa niet tanytqany üşın Qasym-Jomart Toqaevqa rizaşylyǧyn bıldırdı. Onyŋ aituynşa, Beijıŋ qazaq-qytai mäŋgı ärı jan-jaqty serıktestıgın tereŋdetuge airyqşa män beredı.
-Araǧa ekı ai salyp qaita jüzdesıp otyrmyz. Būl qytai-qazaq qatynastarynyŋ deŋgeiı joǧary ärı erekşe sipatta ekenın körsetedı. Sızdıŋ töraǧalyǧyŋyzben ekınşı «Qytai – Ortalyq Aziia» sammitı tabysty öttı. Bız Qytai men aimaq elderınıŋ yntymaqtastyq ruhyna sai keletın jäne Qytai – Ortalyq Aziia dialogynyŋ jaŋa kezeŋıne jol aşatyn maŋyzdy qūjattar qabyldadyq. Sondai-aq qytai-qazaq qatynastaryna tyŋ serpın beretın jaŋa strategiialyq uaǧdalastyqtarǧa qol jetkızdık. Halyqaralyq ahual qalai qūbylatynyna qaramastan, Qytai men Qazaqstan bır-bırıne ärdaiym senım artyp, arqa süiei alatyn strategiialyq serıktester. Ekı el tatu körşılık jäne dostyq bailanystarǧa ärqaşan beiıl. Bız aşyqtyq pen özara tiımdı yntymaqtastyq qaǧidattarynan ainymai, taǧdyry ortaq körşıles elder qoǧamdastyǧyn qūru baǧytyn ūstanamyz. Tüpkı müddemız ben basty tüitkılderge qatysty mäselelerde bır-bırımızge jan-jaqty qoldau körsetuge äzırmız. Sonymen qatar qytai-qazaq qatynastaryn müldem jaŋa deŋgeige köteru üşın san qyrly yntymaqtastyǧymyzdy keŋeituge niettımız, – dedı Si Szinpin.
Kezdesu barysynda sauda-ekonomikalyq, investisiialyq jäne mädeni-gumanitarlyq yntymaqtastyqty nyǧaitu joldary qarastyryldy. Tauar ainalymyn ūlǧaitudyŋ jäne kölık-logistika, energetika, sifrlandyru, jasandy intellekt, auyl şaruaşylyǧy salalarynda ırı investisiialyq jobalardy ıske asyrudyŋ maŋyzyna nazar audaryldy.
Memleketter basşylary öŋırlık jäne halyqaralyq kün tärtıbındegı özektı mäseleler jönınde pıkır almasty.