Bügınde Aneliia Anelya Alim New York kosmetika brendın (AQŞ öndırısı) qalyptastyryp, Niu-Iorktegı makiiaj mektebınıŋ negızın qalaǧan. Kosmetika brendı arqyly ol Bükılälemdık The makeup shou körmesınde Bobbi Braun, Danessa Mirik, makiiaj akademiiasymen bır körmede makiiaj jasaudyŋ qyr-syryn körsetken. New York Fashion Week sän şouyn, osy siiaqty 16 şou ūiymdastyrǧan. Älemge äigılı amerikalyq änşı Beionsenıŋ prodiuserımen bırge jūmys ıstegen.
Aita ketsek, EB-1 vizasy nemese Einştein vizasy – şeteldık daryndy därıgerlerge, ǧalymdarǧa, sportşylarǧa, mädeniet qairatkerlerıne jäne tabysty käsıpkerlerge arnalǧan viza.
Biznes-ledimen bolǧan sūhbatty nazaryŋyzǧa ūsynamyz.
– Aneliia hanym, bır jyl būrynǧy sūhbattaryŋyzdyŋ bırınde Amerikada 3 türlı biznesıŋız bar ekenın aitypsyz. Şyǧarmaşylyq pen kommersiiany qalai ūştastyrasyz? Bırneşe biznestı qatar döŋgeletuge ülgeru qiyn emes pe?
– İä, būǧan deiın Qazaqstanda meiramhana biznesı, sūlulyq salony, kiım-keşek biznesımen ainalysqanmyn. AQŞ-qa alǧaş kelgende de bırneşe biznestı qolǧa aldym. Däl qazır nazarym negızınen Niu-Iorktegı makiiaj mektebımız ben MLM jelılık marketingıne auyp otyr.
«Eger sen jūmysyŋdy jaqsy körseŋ, kün saiyn jūmys ısteuge daiyn bolasyŋ» dep Konfusii aitqandai, men öz jūmysymdy qatty jaqsy köremın. Adamdarǧa sūlulyq syilaǧym keledı. Menıŋ komandama, MLM jelılık marketingıne jūmysqa kelgen är adamnyŋ denı sau, baqytty, tabysty bolǧanyn qalaimyn. Būl – menıŋ kompaniiamnyŋ maqsaty.
– Brend kosmetikalyq önımıŋız turaly aityp ötseŋız. AQŞ-tyŋ qai qalalarynda, basqa qai elderde satylymda bar? Qazaqstan naryǧyna qaşan şyǧarmaq josparyŋyz bar?
– Önımderımız – dekorativtık kosmetika. Är kosmetika qūramynda A, N, C därumenderı bar. Ziiandy qospalary joq. Öitkenı Amerikada zaŋ qatal. Jalpy, damyǧan elder kosmetika naryǧyn qataŋ baqylaidy. Olardyŋ ärqaisysynyŋ öndırısı men satylymynda özıne tän erejesı bolady. Sondyqtan aty joq kosmetikany satyp aluǧa bolmaidy. Öitkenı onyŋ neden jasalǧany belgısız. Mümkın ol densaulyqqa qauıp töndıretın ziiandy qospalardan jasalǧan şyǧar, kım bıledı?! Qalai satudy, kosmetikadaǧy ingredientterdı är el ärtürlı tekseredı. Mysaly, mūny AQŞ-ta Azyq-tülık pen medikamentterdıŋ sapasyn sanitarlyq boiynşa baqylau basqarmasy (FDA), Europada Euroodaq pen oǧan müşe är el, Japoniiada Densaulyq saqtau, eŋbek jäne äl-auqat ministrlıgı, Reseide Rospotrebnadzor baqylaidy. Älbette, kosmetikanyŋ bärı ziiansyz deuge bolmaidy. Degenmen dekorativtık kosmetika, äsırese, qataŋ baqylaityn AQŞ pen Japoniiada ziiansyz bolyp sanalady.
Önımderımız AQŞ-tyŋ barlyq ştatynda satylady. Äsırese, Niu-Iork pen Los-Andjeles, Florida, Orlando jäne Maiami, Tehas tūrǧyndary köp tūtynady.
Kosmetikalarymyz Qazaqstan naryǧynda da satylyp jatyr. Onlain tapsyrys tüsken soŋ tauardy Niu-Iorkten jöneltemız. Jeke saitym arqyly tapsyrys tüsse, önımderımızdı älemnıŋ kez kelgen jerıne jetkıze alamyz.
Būl rette aita ketetını, MLM kompaniiasyn aşyp jatyrmyz. Qazırgı taŋda osy kompaniia boiynşa zaŋdyq tūrǧydaǧy jan-jaqty jūmystary jürgızılıp jatyr. Alda osy MLM ANELYA ALIM NEW YORK COSMETICS jelılık marketingı arqyly kosmetikalarymyzdy bükıl älemge satylymǧa şyǧarmaq josparymyz bar. Sätın salsa, bırınşı Europa, odan keiın TMD jäne Aziia, iaǧni Qytai, Koreia aumaǧynda önımderımızdıŋ qoldanu aiasyn keŋeitpekpız. Būǧan äleuetımız jetedı. Öitkenı Amerikada ülken naryqqa şyǧuǧa mümkındık zor. Jalpy, men Niu-Iorktegı sän aptalyǧyna qatysyp tūramyn. Bızdıŋ kosmetikamyz New York Fashion Week, HAMPTONS Fashion Week, Brooklyn Fashion Week siiaqty sän aptalyqtaryna demeuşı bolady. Anelya Alim New York makiiaj mektebın Niu-Iorkte tūraqty türde şaqyryp tūrady. Endı Londannan da, Parij, Milan, japondyq sän salasynan da şaqyrtular tüsıp jatyr.
– Makiiaj adamǧa qalai äser etedı? Qandai küş beredı?
– Men būl taqyrypta ǧylymi maqala jazǧanmyn. Onda makiiajdyŋ adam psihologiiasyna qalai äser etetını turaly tarihi mälımetterge üŋıldım. Boianǧan soŋ ainaǧa qaraǧan äieldıŋ özıne degen senımdılıgı artady. Iаǧni makiiajdan keiın neirondyq bailanys arqyly miǧa signal berıledı. Äiel adamnyŋ özıne degen süiıspenşılıgı artady.
Mysaly, amerikalyq jazuşy, 50 kıtaptyŋ avtory Luiza Hei «21 künde özıŋdı jaqsy kör» degen kıtabynda ainamen jūmys turaly aitady. Eger äiel är kün saiyn boianyp, ainaǧa qarasa, öz-özın jaqsy köre bastaidy. Özın jaqsy körgen kezde äiel denı sau, baqytty bolady. Al äiel baqytty bolsa, barlyq otbasy müşelerı, balalary da, tıptı bükıl halyq baqytty bolady degen söz. Sondyqtan kez kelgen memlekette bırınşı kezekte äiel adamdy baqytty qyluǧa män berıluı kerek. Özın baqytty sezıngen äiel şabyttanyp, jasampazdyq jūmystardy jasaidy, älemnıŋ jaqsara tüsuıne yqpal etedı dep oilaimyn. Menıŋ missiiam – äielderge özderın jaqsy köre tüsuıne kosmetika, makiiaj arqyly äser etu.
– Qandai brendtermen nemese tanymal tūlǧalarmen serıktes retınde jūmys jürgızesız? Beionsenıŋ prodiuserımen serıktes bolǧanyŋyz ras pa? Onymen bailanysyŋyz qalai örbıdı?
– Men AQŞ-qa kelgen soŋ New York Fashion Week sän aptalyǧyn ūiymdastyra bastadym. Ekı jyl ışınde 17 şou ūiymdastyrdym. Sondai kezde öner jūldyzdarymen kezdesıp, olarmen tanysyp, bailanys ornatuǧa mümkındık tudy. Köptegen tanymal jūldyzdarmen tanystym. Sonyŋ ışınde Beionsenıŋ soprodiuserı Toni Evordstan saltanatty şaraǧa şaqyrtu alyp, onyŋ komandasyndaǧy qyzdarǧa makiiaj jasadyq. Sol kezde Toni Evordsqa ülken marapat tabystaldy.
Onymen bailanysym kezdeisoq boldy. Kezektı tapsyrys boiynşa jūmys ısteuge kelgenımızde bır äiel adamnyŋ türı tanys körındı. Onyŋ instagram akkauntyna kırıp körgen soŋ tanymal tūlǧa ekenın baiqadym. Jalpy, Amerikada älemge äigılı tanymal adamdardy syrtynan köp kezdestırıp qaluǧa bolady. Sondyqtan keide olardyŋ tanymal adam ekenın aŋǧarmai da qaluymyz mümkın.
– «Älemdegı eŋ tabysty top-30 äiel» qataryna qosylypsyz. Qūtty bolsyn! Onda qandai kriteriiler negızınde öttıŋız?
– Raqmet. Onda negızınen biznestegı kriteriilerge qarady. Mende ol kezde Qazaqstanda 3 sän salonym boldy. Franşiza boiynşa jūmys jürgızdım. Sonymen qatar özımnıŋ brendtı kosmetikamnyŋ, AQŞ-taǧy makiiaj mektebımnıŋ jūmys ıstep tūrǧanyn, bırneşe biznesımnıŋ baryn eskergen boluy kerek, maǧan özderı bailanysqa şyqty. Sondai-aq men turaly qazaqstandyq jäne amerikandyq būqaralyq aqparat qūraldary özderınıŋ resurstaryna talai märte jariialaǧan bolatyn. Menıŋ suretım jurnaldyŋ basty betıne basylǧan. Osy kriteriiler boiynşa menı «Älemdegı eŋ tabysty top-30 äiel» qataryna qosuǧa laiyq körgen siiaqty.
– Sızdıŋ dollarly millioner ekenıŋız aitylady. Eger qūpiia bolmasa, bailyǧyŋyz qanşa dollarǧa baǧalanady? Forbsta neşınşı oryndasyz?
– Dollarly millioner deŋgeiıne alǧaş ret 28 jasymda jettım. Qazırgı taŋda tabysym özımnıŋ biznesterıme investisiia retınde salynyp jatyr. Biznesterım AQŞ-ta da, Qazaqstanda da jürıp jatyr. Degenmen qazırgı taŋda negızgı küştı AQŞ-taǧy bizneske jūmsap jatyrmyn. Äzırge forbs tızımınde joqpyn. Degenmen jaqyn arada ondaǧy tızımde de esımım paida bolady dep ümıttenemın.
– Komandaŋyzda qazır neşe adam jūmys ısteidı?
– Qazırgı uaqytta menıŋ komandamda vizajist, stilist, fotograf, videograf siiaqty mamandar men modeldık agenttıktıŋ mamandaryn qosqanda 70-ten asa adam jūmys ıstep jür.
– Bolaşaqta Qazaqstanǧa oralyp, otandyq käsıpkerlerdı oqytyp, el ekonomikasyn köteruge üles qosqyŋyz keletının aitypsyz. Osy jäne basqa da aldaǧy josparlaryŋyz jaily aityp ötseŋız.
– Ärine, elımızdıŋ damuyna öz ülesımdı qosqym keledı. Jalpy, menıŋ negızgı maqsatym – bailyqqa kenelu emes. Öitkenı men joǧaryda aityp ötkenımdei, 28 jasymda dollarly millioner deŋgeiıne jetkenmın. Qymbat päterde tūryp, qymbat kölıktı tızgındep, barşylyqty kördım. Sodan keiın de şyǧar baqyttyŋ aqşada emes ekenın tüsındım. Men üşın qazır baqyt degenımız – basqa adamdardyŋ baqytty boluyna järdemdesu. Menıŋ ömır süru filosofiiam qarapaiym, özımdı qarapaiym ūstaimyn. Köptegen adamnyŋ ışkı jan düniesınıŋ tynyş boluyna, özıne degen senımdılıgınıŋ artuyna, baqytty kün keşuıne äser etkım keledı. Är adam denınıŋ sau bolǧanyn, baqytty da bai bolǧanyn qalaidy. Bükıl älemdegı adamdarǧa osy üş kriteriidı MLM jelılık marketing kompaniiam arqyly bergım keledı.
Al Qazaqstan turaly aitar bolsaq, men öz elımdı qatty jaqsy köremın. Elıme degen alǧysym zor. Men Taraz qalasynda düniege kelgenmın. Ata-anam menı patriot etıp tärbieledı. Bügınde men Amerikada osyndai jetıstıkterge äkem men anamnyŋ maǧan degen süiıspenşılıgınıŋ, senımınıŋ arqasynda jetıp jürmın. Qazırgı taŋda balamdy jalǧyz özım tärbielep kelemın. Ol menıŋ – bar bailyǧym, ony maqtan tūtamyn.
Jalpy, qazaqstandyqtar öz-özderıne senımdı bolyp, eŋbek etıp, biznes aşyp, baiysa eken dep tıleimın. Qazaqstannyŋ ekonomikasyn köteru üşın myqty zaŋdar, mamandar kerek. Memlekettı halyq köteredı. Sol üşın halyq bılımdı boluy kerek. Sondyqtan belgılı bır deŋgeide men de qolymnan kelgenşe aǧartuşylyq baǧytta studentterge, elımızge eŋbegımdı sıŋırgım keledı. Būl rette motivasiialyq kıtabymdy jazyp jatyrmyn. Alda derektı film, kino tüsırıp, biznes forumdar, şeberlık sabaqtar ötkızgım keledı. Sonymen qatar aldaǧy uaqytta saiasi forumdarǧa qatysyp, elde biznesmenderdı köptep şyǧaru, jaŋa jobalar jasau boiynşa ün qosqym keledı. Qazır men Amerikada biznes tūrǧysynda bılımımdı jetıldırıp jatyrmyn. Baiqauymşa, AQŞ-ta memleket tarapynan bizneske köp qoldau körsetıledı. Ülken kölemdegı granttar bölınedı. Ol granttar, äsırese, äielderge, jalǧyzbasty analarǧa berıledı. Men AQŞ-tyŋ biznes jüiesın zerttep jatyrmyn. Sony bızdıŋ elımızge de ūsynǧym keledı. Sondyqtan uaqyt tauyp, otandyq basylymdarǧa pıkır bıldırıp, telearnalarǧa sūhbat berıp tūramyn. Qarapaiym otbasynan şyǧyp, osyndai jetıstıkke öz eŋbegımmen jetken menıŋ ünımdı estıp, otandastarymyzdyŋ da öz-özıne degen senımdılıgı artsa eken deimın.
– Sūhbatyŋyzǧa köp raqmet! Arman-mūratyŋyzǧa jetuıŋızge tılektespız!
Sūhbattasqan Nūrdäulet Käkış