Qazaqstandyq rejisser Alina Mūstafinanyŋ «Prianiki dlia eio otsa, moego pradeda, eio deda» filmı İtaliianyŋ Bolsano qalasynda 4-13 säuır aralyǧynda ötıp jatqan 38-şı Bolzano Film Festival Bozen festivalınıŋ baiqaudan tys baǧdarlamasyna qatysty. Atalǧan film Piccole lingue DOC baǧdarlamasy aiasynda körsetıldı, būl baǧdarlama bolmys pen mūra taqyryptaryn qamtityn derektı filmderge arnalǧan.
Kinokartina QR Mädeniet jäne aqparat ministrlıgınıŋ, Ūlttyq kino ortalyǧynyŋ qoldauymen tüsırılgen. Öndırıstı UVENT production kinokompaniiasy jüzege asyrdy. Filmnıŋ prodiuserlerı – Aqjol bi Särsembaev pen Erkejan Maqsūt.
Filmde Liabiba esımdı keiıpker 1944 jyly Ekınşı düniejüzılık soǧys kezınde qaitys bolǧan äkesınıŋ qabırın ızdeidı. Tuyndy tüp-tamyryn tanyǧysy kelgen ärbır adam üşın jan tebırenterlık.
Būl joba būǧan deiın de halyqaralyq deŋgeide moiyndalyp ülgerdı – filmnıŋ älemdık premerasy Pusan kinofestivalınde, europalyq premerasy Turinde öttı. Kinokartina Almatydaǧy «Bastau» festivalınde «jarqyn debiut» jüldesın, al Tegeranda ötken Cinéma Vérité festivalınde «Üzdık halyqaralyq film» jüldesın jeŋıp alǧan bolatyn.
Aita ketu kerek, 1987 jyly qūrylǧan Bolzano Film Festival Bozen festivalı mädeni jäne tıldık ärtürlılıkke erekşe män beredı.
Aqparattyq qoldau negızınde