Būl turaly Qazaqstan Respublikasy Prezidentınıŋ keŋesşısı – Baspasöz hatşysy Berık Uäli Tengrinews.kz saityna bergen sūhbatynda aitty.
– Juyrda (23-24 qazan künderı) Qazan qalasynda BRİKS sammitı ötedı. Bızge belgılı bolǧandai, atalǧan qūrylymǧa töraǧalyq etıp otyrǧan Resei Prezidentı Vladimir Putin Qasym-Jomart Toqaevty forumǧa qonaq retınde şaqyrǧan...
– Prezidenttıŋ jūmys kestesınde onyŋ BRİKS sammitıne qatysuy qarastyrylǧany ras. Memleket basşysy 24 qazan künı qūrylymnyŋ «autrich» formatyndaǧy keŋeitılgen qūramda ötetın jiynynda söz söileidı.
– Äzerbaijan men Belarus BRİKS qūramyna kıru üşın ötınım berıp qoidy. Sonymen qatar TMD-nyŋ özge elderı de ynta bıldırgen boluy mümkın. Qazaqstannyŋ BRİKS-ke qatysty ūstanymy qandai? Bızdıŋ elımız atalǧan halyqaralyq qūrylymǧa müşe boludy josparlap otyrǧan joq pa?
– Qazaqstan BRİKS-tıŋ damu evoliusiiasyn qyzyǧuşylyqpen mūqiiat baqylap otyr. Bızdıŋ elımız osy qūrylymnyŋ negızın qalaǧan memleketter basşylarynyŋ qandai da bır alpauyt derjavanyŋ gegemoniiasynan azat, ädılettı ärı demokratiialyq älemdık tärtıp qūru turaly bastamasyn qoldaidy.
Prezidentke Qazaqstannyŋ BRİKS qūrylymyna kıru mümkındıgın qarastyru turaly ūsynystar tüstı. Halyqaralyq qauymdastyqtyŋ jauapty jäne bedeldı müşesı retınde bızdıŋ elımızge mūndai ūsynystyŋ tüsuı qalypty dünie.
Būl ūsynysty Memleket basşysynyŋ özı mūqiiat qarastyryp otyr jäne onyŋ tapsyrmasy boiynşa tiıstı vedomstvolar Qazaqstannyŋ ūlttyq müddelerı tūrǧysynan taldau jürgızıp jatyr.
Elımız qūrylymǧa müşe boluǧa jäne osy bırlestıktıŋ damu perspektivalaryna qatysty basqa da mäselelerdı qaraudyŋ köp satyly prosesın eskere otyryp, qazır jäne jaqyn bolaşaqta BRİKS-ke müşe boluǧa ötınış beruden qalys qalady.
– Mūndai jaǧdaida qazaq diplomatiiasy qai ūiymǧa basymdyq bermek?
– Prezident būǧan deiın bırneşe ret BŪŪ-ny älemdegı ämbebap ärı balamasy joq ūiym retınde ataǧan bolatyn. Sondai-aq osy Ūiymda barlyq özektı halyqaralyq problemalardy, sonyŋ ışınde ädılettı älemdık tärtıp qūruǧa qatysty mäselelerdı talqylau kerek degen ūstanymyn bıldırgenı jūrtşylyqqa mälım.
– Alaida BŪŪ qauqarsyz ūiymǧa ainaldy degen pıkır de joq emes qoi...
– Prezidenttıŋ pıkırınşe, BŪŪ da kemşılıksız emes. Bıraq däl sondai basqa ūiym joq. Sondyqtan BŪŪ-ǧa älemdık qauymdastyqtyŋ qoldauy auadai qajet.
BŪŪ Jarǧysy halyqaralyq qūqyqtyŋ negızı boluy kerek jäne būl ırgelı qūjatta bekıtılgen qaǧidalardy būzuǧa eşkımnıŋ qaqysy joq.
Prezident BŪŪ Qauıpsızdık Keŋesınıŋ maŋyzdy ärı taǧdyrşeştı şeşım qabyldau ısınde därmensızdık tanytyp otyrǧanyna ökınış bıldırgen bolatyn. Sondyqtan Memleket basşysy «orta derjavalardyŋ» müddelerın eskere otyryp, BŪŪ-ǧa müşe memleketterdıŋ keŋ auqymdy konsultasiialary negızınde BŪŪ Qauıpsızdık Keŋesın reformalaudy bastau qajet dep esepteidı.