Qūrmettı otandastar!
Barşaŋyzǧa Otan qorǧauşy künı qūtty bolsyn!
Memlekettık ärı qoǧamdyq maŋyzy airyqşa merekede jauyngerlerımızdıŋ eren erlıgı, myqty ruhy men qaitpas qaisarlyǧy keŋınen därıpteledı. Būl – Qazaqstannyŋ qauıpsızdıgın, tūraqtylyǧy men tynyştyǧyn kündız-tünı qas qaqpai küzetken, sondai-aq qazır Otan aldyndaǧy boryşyn adal ötep jatqan barşa azamatqa qūrmet körsetıletın kün.
El jauyngerlerı men komandirlerı batyr babalarymyzdyŋ daŋqty jolyn jalǧastyryp, naǧyz otanşyldyq ruhynyŋ jarqyn ülgısın körsetıp keledı. Sardarlar men sarbazdardyŋ, barlyq küştık qūrylym qyzmetkerlerınıŋ bıtımgerlık missiialar, arnauly oqu-jattyǧu jiyndary men türlı halyqaralyq saiystar kezındegı käsıbi şeberlıgı, temırdei tärtıbı men jauyngerlık daiarlyǧy – sonyŋ aiqyn dälelı. Quatty äskerımız eŋ kürdelı mındetterdı oryndauǧa qaşanda daiyn ekenı sözsız. Sondyqtan, memleket elımızdıŋ qorǧanys qabıletın küşeituge jäne äskeri qyzmetşılerdıŋ äleumettık jaǧdaiyn jaqsartuǧa ärdaiym
basa män beredı.
Jaŋa Konstitusiiada «Qazaqstan Respublikasyn qorǧau – onyŋ är azamatynyŋ qasiettı paryzy men mındetı» dep jazyldy. Osy asa maŋyzdy tūjyrym memleket pen halyqtyŋ tyǧyz bailanysyn, el taǧdyryna ärbır otandasymyzdyŋ jauapty ekenın aŋǧartady. Bız Otanǧa qaltqysyz qyzmet etu qaǧidatyn jäne Konstitusiiada aiqyndalǧan myzǧymas qūndylyqtardy negızge ala otyryp, san ǧasyrlyq tarihy bar memlekettılıgımızdıŋ tūǧyryn nyǧaita tüsemız, biık maqsat-mūratymyzǧa jetıp, Ädılettı, Küştı, Qauıpsız Qazaqstandy qūramyz. Men būǧan kämıl senemın.
Antyna adal bolyp, tabandylyq tanytyp, mınsız qyzmet etıp jürgen Otan qorǧauşylarymyzǧa alǧys aitamyn.
Barşa azamattarymyzǧa myqty densaulyq, amandyq jäne tabys tıleimın!
Armiiamyzdyŋ aibyny, halqymyzdyŋ yntymaǧy arta bersın!
Qasterlı Täuelsızdıgımızdıŋ tūǧyry bekem bolsyn!