Joba halyqaralyq ozyq täjıribege negızdelgen: köptegen elderde mektep direktorlaryn taǧaiyndamas būryn olardy arnaiy daiarlau mındettı talap sanalady. Qatysuşylar oqudan ötıp, üzdık bılım beru ūiymdarynda taǧylymdamadan ötedı jäne tälımgerlık qoldaumen qamtylady. Būl basqaruşylyq qabıletterdı jüielı türde damytuǧa jäne senımdı şeşım qabyldai alatyn jetekşılerdı qalyptastyruǧa mümkındık beredı.
Bügıngı taŋda respublikalyq kadrlyq rezervke 583 pedagog engızılıp, olardyŋ 397-sı konkurstan tys negızde basşylyq qyzmetke taǧaiyndaldy. Tek 2024 jyldyŋ özınde 36 rezervist jaŋa ülgıdegı «Keleşek mektepterı» jobasy aiasynda salynǧan mektepterdıŋ direktorlary boldy.
Jobaǧa qatysuşynyŋ bırı – №290 jaily mekteptıŋ direktory Möldır Smahanova. Ol barlyq kezeŋnen ötıp, baǧdarlamaǧa sai jan-jaqty daiyndyqtan öttı. Basşylyqqa taǧaiyndalmas būryn zamanaui basqaru täsılderın meŋgerıp, käsıbi daǧdylaryn jetıldırdı.
«Būl joba menıŋ direktor qyzmetıne degen közqarasymdy mülde özgerttı. Qazırgı zamanǧy mektepke tek basqaruşy emes, ūjymdy yntalandyryp, mūǧalımderdıŋ käsıbi damuyna jäne oquşylardyŋ qabıletın tolyq aşuǧa mümkındık beretın köşbasşy qajet. «Keleşek mektepterı» modelı osyndai jaŋa basqaru mädenietın qalyptastyrady», – dedı joba tülegı.
Prezidenttık jastar kadrlyq rezervı täjıribesıne negızdelgen būl joba 2023 jyldan bastap Qazaqstan Respublikasy Oqu-aǧartu ministrlıgınıŋ bastamasymen jüzege asyrylyp keledı. Qatysuşylardy ırıkteu prosesı bes kezeŋnen tūrady: testıleu, oqytu, taǧylymdama, qorytyndy baǧalau jäne sūhbat. 2024 jyly 2,5 myŋnan astam ümıtkerdıŋ arasynan käsıbi daiarlyq kursyna 433 kandidat ırıktelıp alyndy.