Keşendı jarys 24 aqpan men 1 qazan aralyǧynda sporttyŋ 34 türınen ūiymdastyryluda. Atalǧan dodaǧa 2000-nan astam sportşy qatysady.
Türkıstan qalasyndaǧy «Türkıstan Arena» stadionynda ötken aşylu räsımıne Qazaqstan Respublikasy Turizm jäne sport ministrı Erbol Myrzabosynov, Türkıstan oblysynyŋ äkımı Nūralhan Köşerov, Astana, Almaty, Şymkent qalalary men oblystardyŋ dene şynyqtyru jäne sport basqarmalarynyŋ basşylary, sondai-aq sport salasynyŋ qūrmettı mamandary qatysty.
Erbol Myrzabosynov aşylu saltanatynda söilegen sözınde mūndai jarystar jas sportşylar üşın airyqşa maŋyzǧa ie ekenın atap öttı.
«Barşaŋyzdy kielı Türkıstan topyraǧynda körgenıme quanyştymyn! Qazaqstan Respublikasynyŋ VI Jastar sport oiyndaryna qoş keldıŋızder! Biylǧy oiyndar Jeŋıstıŋ 80 jyldyǧy qarsaŋynda ötıp jatyr. Ata-babalarymyz sūrapyl soǧysta eren erlık körsetıp, bızge bügıngı beibıt kündı syilady. Batyrlardyŋ erlıgı men eŋbegın ūmytpauymyz kerek. Özderıŋız bıletındei, Memleket basşysy sport salasynyŋ damuyna erekşe nazar audaryp keledı. Sonyŋ nätijesınde otandyq sporttyŋ deŋgeiı jyldan jylǧa artyp keledı. Bızdıŋ sportşylar halyqaralyq jarystarda jarqyn jetıstıkterge jetıp, el abyroiyn asqaqtatyp jür. Al Jastar sport oiyndary siiaqty keşendı ıs-şaralar otandyq sportty jaŋa deŋgeige köteruge serpın beredı. Sondai-aq jas ūrpaqty salamatty ömır saltyn ūstanuǧa baulidy. Biylǧy bäsekede baǧy men baby qatar şapqan eŋ üzdık sportşylar jeŋıs tūǧyrynan körınedı dep senemın», – dedı Turizm jäne sport ministrı.
Türkıstan oblysynyŋ äkımı Nūralhan Köşerov öŋırde sport salasy qarqyndy damyp jatqanyn atap öttı.
«Tarihi şaharǧa qoş keldıŋızder! Memleket basşysy Qasym-Jomart Kemelūly sport salasyn jan-jaqty damytudy tapsyrǧan bolatyn. Osyǧan orai, bügın Türkıstan qalasynda VI Jastar oiyndary bastaldy. Būl – el bolaşaǧy sanalatyn jastarymyzdyŋ şeberlıgın şyŋdap, jaŋa chempiondar tärbieleitın maŋyzdy jarys. Biylǧy dodaǧa elımızdıŋ barlyq öŋırınen 2 myŋnan astam jas sportşy qatysuda. Al Türkıstan oblysynan sporttyŋ 34 türınen 300-den astam sportşy qatysady. Mūndai ırı ıs-şaranyŋ Türkıstanda ötuı zaŋdylyq. Sebebı aimaqta sport infraqūrylymy jaqsy damyp jatyr. Būqaralyq sportty damytu maqsatynda 2024 jyly 73 sport nysanynyŋ qūrylysy aiaqtaldy. 2025 jyly zamanaui ülgıdegı 51 sporttyq nysan paidalanuǧa berıledı. Onyŋ ışınde atşabar men eskek esu kanaly bar. Sızder sport saiystarynda oblys qana emes, tūtas Qazaq elınıŋ namysyn qorǧaisyzdar. Būl jarys arqyly ülken belesterge qadam jasaisyzdar. Aralaryŋyzdan Älem, Olimpiada chempiondary şyǧa bersın! Barşaŋyzǧa ädıl bäseke, sättılık jäne jarqyn jeŋıster tıleimın!», – dedı Nūralhan Köşerov.
VI Jastar sport oiyndary elımızdıŋ barlyq öŋırlerınde ötedı. Onyŋ ışınde Türkıstanda basketboldan, baidarkada jäne kanoede esu sport türlerı boiynşa ūiymdastyrylady.
Biylǧy Qazaqstan Respublikasynyŋ VI Jastar sport oiyndary QR Dene şynyqtyru men sportty damytudyŋ 2023-2029 jyldarǧa arnalǧan tūjyrymdamasyn ıske asyru, ūlttyq qūrama komandany jasaqtau jäne halyqaralyq jarystarǧa, onyŋ ışınde 2025 jyly Bahreinde ötetın jastar arasyndaǧy jazǧy Aziia oiyndaryna daiyndyq aiasynda ötkızılude.
Sondai-aq ministr Türkıstan oblysyna sapary barysynda Halyqaralyq turizm jäne meimandostyq universitetınıŋ aumaǧynda ornalasqan dene şynyqtyru-sauyqtyru keşenın aralap kördı.