Jambyl oblysynda 2019-2025 jyldar aralyǧynda «Auyl – El besıgı» jobasy aiasynda 189 auylda jalpy qūny 81,9 mlrd teŋgenı qūraityn 1 073 joba jüzege asyryldy. Būl turaly oblystyq ekonomika jäne biudjettık josparlau basqarmasynyŋ basşysy Sanduǧaş Abdralieva mälımdedı.
«Auyl – El besıgı» jobasy 2019 jyldan berı jüzege asyrylyp keledı. Jobanyŋ negızgı maqsaty – auyl tūrǧyndarynyŋ ömır süru sapasy men äl-auqatyn arttyru, eldı mekenderdı tūraqty damytu.
Soŋǧy alty jylda öŋırdegı eldı mekenderdıŋ äleumettık jäne injenerlık infraqūrylym aitarlyqtai jaqsardy. Atap aitqanda, 71 bılım beru, 35 densaulyq saqtau, 54 mädeniet, 51 sport jäne 85 kommunaldyq-şaruaşylyq nysany paidalanuǧa berıldı. Sonymen qatar jalpy ūzyndyǧy 892 şaqyrymdy qūraityn 776 auylışılık köşe ortaşa jöndeuden öttı.
Biyl ötpelı 19 jobany ıske asyru josparlanuda.
Baizaq audanynyŋ Qosaq, Jambyl audanynyŋ Toǧyztarau, T. Rysqūlov audanynyŋ Qaraqat, Şu audanynyŋ Töle bi jäne Eŋbekşı auyldaryndaǧy 7 mektepke japsarlas ǧimarattar salynady.
Sondai-aq Jualy audanynyŋ Nūrlykent, Költoǧan, Qarasaz, T.Rysqūlov audanynyŋ Qūlan, Qordai audanynyŋ Ülken Sūlutör, Şu audanynyŋ Jaŋajol jäne Şoqpar auyldarynda 8 dene şynyqtyru-sauyqtyru keşenın paidalanuǧa beru közdelıp otyr.
Būdan bölek, Jambyl audanynyŋ Besaǧaş, Talas audanynyŋ Oiyq jäne Üşaral auyldarynda 3 mädeniet üiı aşylady dep josparlanuda.
Kölık infraqūrylymy salasynda da bır jobany jüzege asyru közdelgen.
Aita keteiık, oblystaǧy 357 eldı mekende 1 216,1 myŋ adam tūrady. Onyŋ ışınde 353-ı auyldyq eldı meken bolsa, onda 678,3 myŋ adam nemese öŋır halqynyŋ 55,8 paiyzy qonystanǧan.