Düniejüzılık densaulyq saqtau ūiymy «İmmundyq patrul» atty bılım beru oiynyn ıske qosty. Osy arqyly älemnıŋ tükpır-tükpırındegı oquşylarǧa virustardyŋ, immunitettıŋ jäne vaksinasiianyŋ qalai jūmys ısteitını tüsındırıledı. Platforma qazaq tılıne de audarylǧan. Astanada №113 jaily mekteptıŋ 8-synyp oquşylary özderın synap kördı

Aldymen oquşylarǧa virustardyŋ ne ekenı jäne olardyŋ qalai taralatyny tüsındırıldı, keiın sifrlyq platforma körsetılıp, synyp täjıribelık bölımge öttı.

«İmmundyq patrul» baǧdarlamasynda oqu materialy oiyn simuliasiiasyna engızılgen. Oquşylar şaǧyn toptarǧa bölınıp, kompiuterlerde jūmys ıstei bastady. Ekranda infeksiialardyŋ aǧzaǧa enuı modeldenedı, al qatysuşylardyŋ mındetı – immundyq jüienıŋ qalai äreket etetının jäne qandai mehanizmder ıske qosylatynyn tüsınu.

Oqu barysynda balalar naqty elementterdı meŋgeredı. Mäselen, dendrittık jasuşalardyŋ qalai äreket etetını, T- jäne V-limfositterdıŋ aiyrmaşylyǧy, antidenelerdıŋ qalai tüzıletını jäne fagositterdıŋ qandai röl atqaratyny qarastyrylady. Būl prosesterdıŋ barlyǧy şeşım qabyldaudy talap etetın ssenariidıŋ bır bölıgıne ainalady jäne onyŋ nätijesı bırden körınedı.

Siujettık qūrylym «akademiia» formatynda jasalǧan, onda oquşylar infeksiialarmen küresu üşın daiyndyqtan ötedı. Är modul qysqaşa kırıspeden, synyptaǧy talqylaudan jäne praktikalyq tapsyrmadan tūrady.

Mūndai format teoriiany tyŋdap qana qoimai, ony bırden täjıribede tekseruge mümkındık beredı.

Baǧdarlama sonymen qatar vaksinasiia, ūjymdyq immunitet, aurulardyŋ taraluy jäne vaksinalardy äzırleu siiaqty keŋ auqymdy taqyryptardy qamtidy. Aqparatty syni baǧalauǧa da erekşe köŋıl bölınedı – onyŋ ışınde şynaiy derekterdı būrmalanǧan nemese jalǧan aqparattan ajyratu mäselesı qarastyrylady.

«İmmundyq patrul» Daniia, Fransiia, Armeniia, Moldova, Türkiia jäne Europanyŋ basqa da elderınde sättı engızılıp, balalardyŋ densaulyq sauattylyǧyn arttyruda aitarlyqtai nätije körsetken.

«Būryn virustardyŋ ne ekenın jäne olardyŋ qalai äser etetının tolyq tüsınbeitınmın, al mūnda bärı naqty prosess arqyly körsetılgendıkten, äldeqaida tüsınıktı boldy», – dedı Ädılet esımdı 8-synyp oquşysy.

Oquşylardyŋ aituynşa, būl format qyzyqty ǧana emes, sonymen qatar paidaly bolǧan.

«İmmunitettıŋ qalai jūmys ısteitının jäne ony ne üşın qoldau kerektıgın tüsındık. Endı ekpenıŋ ne üşın qajet ekenın jäne onyŋ aǧzany qalai qorǧaitynyn bılemız», – deidı olar.