Astana qalasyndaǧy №114 mektepte «Mektep küres ligasy» jobasy aiasynda küres sportyna arnalǧan arnaiy jabdyqtardy tapsyru räsımı öttı. Joba mektep sportyn damytu maqsatynda Turizm jäne sport ministrlıgı, Oqu-aǧartu ministrlıgı jäne Qazaqstan küres federasiiasynyŋ bırlesken bastamasymen jüzege asyrylyp jatyr.
Is-şaraǧa Turizm jäne sport ministrı Erbol Myrzabosynov, Oqu-aǧartu ministrı Jūldyz Süleimenova, Qazaqstan küres federasiiasynyŋ prezidentı Erkın Oqasov jäne sport salasynyŋ ökılderı qatysty.
Mektepterdıŋ sport zaldaryn küreske qajettı arnaiy jabdyqtarmen qamtamasyz etu eldegı küres sportyn damytuǧa, sondai-aq jasöspırımderdıŋ sportpen tūraqty türde ainalysuyna mümkındık beredı. Sonymen qatar joba bılım beru ūiymdarynda kürespen şūǧyldanuǧa qolaily orta qalyptastyruǧa baǧyttalǧan. Osy bastama aiasynda №114 mektepke stasionarlyq küres kılemı tabystaldy.
«Memleket basşysy būqaralyq sportty damytuǧa, balalar men jasöspırımderdıŋ sportpen jüielı türde ainalysuyna erekşe köŋıl bölıp keledı. Osy mındetterdı ıske asyru aiasynda bılım beru ūiymdarynda ūlttyq jäne olimpiadalyq sport türlerın keŋınen nasihattau jūmystary jürgızılude. Küres – halqymyzdyŋ ruhymen bıte qainasqan, batyldyq pen tabandylyqqa tärbieleitın sport türı. Bügın mektepke tabystalyp otyrǧan küres kılemı oquşylardyŋ sportpen tūraqty ainalysuyna, şeberlıkterın şyŋdauyna jäne bolaşaq chempiondardyŋ qalyptasuyna öz ülesın qosady dep senemın», – dep atap öttı Erbol Myrzabosynov.
Sondai-aq ıs-şara barysynda üşjaqty yntymaqtastyq turaly memorandumǧa qol qoiyldy.
Memorandum aiasynda Bırıkken küres älemı (United World Wrestling) ūiymynyŋ qoldauymen «Olimpiadalyq yntymaqtastyq» baǧdarlamasyn ıske asyru, erekşe bılım beru qajettılıgı bar balalar arasynda grek-rim, erkın jäne äielder küresın damytu, sondai-aq seminarlar men bılıktılıktı arttyru kurstaryn ūiymdastyru közdelgen.
Jobanyŋ negızgı maqsaty – oquşylar arasynda būqaralyq sportty damytu, küres türlerın barynşa qoljetımdı etu jäne bolaşaq jas sportşylardy daiarlauǧa qolaily jaǧdai qalyptastyru.