Qazaqstan Respublikasynyŋ Premer-ministrı Oljas Bektenovtıŋ töraǧalyǧymen ötken Ükımet otyrysynda elımızdıŋ 2026 jylǧy qaŋtar–mausym ailaryndaǧy äleumettık-ekonomikalyq damu qorytyndylary men respublikalyq biudjettıŋ atqarylu barysy qaraldy. Oǧan Türkıstan oblysynyŋ äkımı Nūralhan Köşerov beinebailanys arqyly qatysty.
Ükımet otyrysynda Premer-ministrdıŋ orynbasary – Ūlttyq ekonomika ministrı Serık Jūmanǧarin, Ūlttyq bank töraǧasy Timur Süleimenov, qarjy vise-ministrı Erjan Bırjanov, ortalyq memlekettık organdardyŋ basşylary men öŋır äkımderı baiandama jasady.
Jiynda biylǧy jyldyŋ alǧaşqy alty aiyndaǧy äleumettık-ekonomikalyq körsetkışterge taldau jasalyp, negızgı salalardaǧy ösım qarqyny saralandy. Ūlttyq ekonomika ministrlıgınıŋ mälımetınşe, qaŋtar–mausym ailarynyŋ qorytyndysy boiynşa elımızdıŋ jalpy ışkı önımı 4,1 paiyzǧa östı. Naqty sektordaǧy ösım 5,1 paiyzdy, qyzmet körsetu salasy 3,5 paiyzdy qūrady.
Ekonomikanyŋ negızgı baǧyttarynda tūraqty oŋ dinamika qalyptasqan. Atap aitqanda, qūrylys salasy 15,2 paiyzǧa, öŋdeu önerkäsıbı 9,8 paiyzǧa, kölık qyzmetterı 7,1 paiyzǧa östı. Sonymen qatar sauda kölemı 5,7 paiyzǧa, auyl şaruaşylyǧy 4,4 paiyzǧa jäne bailanys qyzmetterı 4,3 paiyzǧa artqan.
Ūlttyq bank töraǧasy Timur Süleimenov bırınşı jartyjyldyqtaǧy infliasiia deŋgeiı 10,3 paiyz bolǧanyn aityp, baǧa tūraqtylyǧyn qamtamasyz etu baǧytynda Ükımetpen bırlesken jūmystar jalǧasyp jatqanyn jetkızdı.
Respublikalyq biudjettıŋ atqaryluy turaly baiandama jasaǧan qarjy vise-ministrı Erjan Bırjanov transfertterdı esepke almaǧanda memlekettık biudjet kırısı 8,5 trillion teŋgenı qūraǧanyn mälımdedı. Biudjet şyǧystary 98,2 paiyz deŋgeiınde oryndalǧan. Äleumettık mındettemelerdı oryndauǧa basymdyq berılıp, zeinetaqylar men järdemaqylardy töleuge 3,6 trillion teŋge, öŋırlerdı qoldauǧa 3 trillion teŋge, naqty sektordy damytuǧa 1,3 trillion teŋge baǧyttalǧan.
Ükımet basşysy Oljas Bektenov Memleket basşysynyŋ tapsyrmasyna säikes el ekonomikasyn ärtaraptandyru jäne tūraqty ösudı qamtamasyz etu baǧytyndaǧy jūmystar jüielı türde jalǧasatynyn atap öttı.
– Jaŋa Konstitusiianyŋ qabyldanuymen elımızdıŋ äleumettık-ekonomikalyq damuynda auqymdy özgerıster jüzege asyryluda. Memleket basşysy qoiǧan mındetter aiasynda tūraqty ekonomikalyq ösudıŋ jaŋa modelıne köşu üderısı jürıp jatyr. Ekonomikany belsendı ärtaraptandyru, zamanaui investisiialyq ekojüienı qalyptastyru, innovasiialyq klasterler men önımdılıgı joǧary industriialardy damytu boiynşa auqymdy jūmystar bastaldy. Ükımettıŋ qadamy ekonomika salalarynda qolda bar äleuettı barynşa tiımdı paidalanuǧa baǧyttalyp otyr, – dedı Oljas Bektenov.
Premer-ministr ekonomikanyŋ tūraqty ösımın saqtau üşın memlekettık organdar men öŋır äkımderıne bırqatar naqty tapsyrmalar jüktedı.
Önerkäsıp jäne qūrylys ministrlıgıne bır ai ışınde metallurgiia salasyn yntalandyrudyŋ qosymşa tetıkterın äzırleu tapsyryldy. Sonymen qatar öŋır äkımdıkterımen bırlesıp barlyq investisiialyq jobalardy zerdelep, problemalyq mäselelerdı anyqtap, olardy şeşudıŋ naqty joldaryn ūsynu mındetı qoiyldy. Ükımet basşysy tūrǧyn üi qūrylysynyŋ qarqynyn tömendetpeudı jäne äleumettık, injenerlık ärı densaulyq saqtau infraqūrylymdaryn salu jūmystaryn erekşe baqylauda ūstaudy tapsyrdy.
Energetika salasynda mūnai men gaz öndırudıŋ josparly körsetkışterıne qol jetkızu, kömırdı tereŋ öŋdeu jobalaryn keŋeitu jäne jaŋa investisiialar tartu mındetterı belgılendı. Sonymen bırge Premer-ministr Türkıstan oblysynda salynyp jatqan bu-gaz qondyrǧysynyŋ belgılengen merzımde paidalanuǧa berıluı erekşe baqylauda ekenın atap öttı. Būl jobanyŋ uaqytyly aiaqtaluyna Energetika ministrlıgı men «Samūryq-Qazyna» qorynyŋ basşylyǧy tıkelei jauapty ekenı eskertıldı.
Kölık salasynda tranzittık äleuettı küşeituge basymdyq berıldı. Osy jyldyŋ soŋyna deiın «Darbaza – Maqtaaral» temırjol jelısı men basqa da strategiialyq temırjol jobalaryn aiaqtau, vokzaldardy jaŋǧyrtu, avtomobil joldarynyŋ sapasyn qamtamasyz etu jäne kölık salasyn sifrlandyru jönınde tapsyrmalar berıldı. Sonymen qatar Smart Data Transport bıryŋǧai derekter platformasyn qalyptastyru arqyly jasandy intellekt negızındegı şeşımderdı engızu közdelıp otyr.
Auyl şaruaşylyǧy salasynda vegetasiialyq kezeŋnıŋ tūraqty ötuın qamtamasyz etu, egın jinau nauqanyn sapaly ūiymdastyru jäne investisiialyq jobalardy uaqytyly jüzege asyru mındetı jükteldı. Sondai-aq maqta öŋdeu käsıporyndaryn jaŋǧyrtu, qant qyzylşasyn tasymaldaudy subsidiialau jäne mal şaruaşylyǧyn damytu baǧdarlamasy aiasynda asyl tūqymdy mal basyn köbeitu jūmystaryn jedeldetu tapsyryldy.
Sauda salasyn damytu mäselesıne de erekşe nazar audaryldy. Premer-ministr barlyq öŋırdıŋ öz äleuetın tiımdı paidalanyp, öndırıs oryndaryn köbeitu, investisiia tartu jäne tauar ainalymyn arttyru boiynşa naqty körsetkışter belgıleuı qajet ekenın aitty. Osyǧan bailanysty öŋır äkımdıkterıne bır ai ışınde Saudany damytudyŋ öŋırlık jol kartalaryn äzırleu tapsyryldy. Arnaiy ekonomikalyq jäne industriialyq aimaqtardyŋ mümkındıgın tiımdı paidalanu arqyly jaŋa öndırıster men käsıpkerlık ortalyqtaryn damytu qajettıgı atap ötıldı.
Ükımet basşysy jiyndy qorytyndylai kele, ortalyq memlekettık organdar men öŋır äkımderınıŋ ekonomikanyŋ josparlanǧan ösım körsetkışterıne qol jetkızu üşın jeke jauapkerşılıgı joǧary ekenın aityp, barlyq qolda bar resurstardy tiımdı paidalanu qajettıgın tapsyrdy.
Aita keteiık, Türkıstan oblysy äleumettık-ekonomikalyq damu körsetkışı boiynşa respublikada köş bastap keledı. Biylǧy 5 aida qysqa merzımdı ekonomikalyq ösım 123,3 paiyzdy qūrap, oblys respublikada 1-orynǧa şyqty.
Türkıstan oblysy äkımınıŋ baspasöz qyzmetı